Аляксандар Лукашэнка 2 красавіка ў інтэрвію тэлекампаніі «Мир» заявіў, што Беларусь не адмаўляецца ні ад якіх пунктаў дамовы аб «саюзнай дзяржаве» з Расеяй. Але з агаворкамі.
«Калі Расея сёньня, адмовіўшыся ад гэтых імпэрскіх замашак — „мы вялікія, а вы малыя“ — гатовая на гэта, давайце весьці перамовы, давайце будзем вызначацца», — цытуе Лукашэнку ягоная прэс-служба.
Паводле Лукашэнкі, для Беларусі «жалезабэтонны прынцып — роўныя ўмовы для людзей, прадпрыемстваў, дзяржаваў», але цяпер «усё парушана», у тым ліку праз пандэмію каранавірусу і закрыцьцё мяжы з расейскага боку, — маўляў, «лёгікі тады не было».
«У нас ёсьць дамова аб стварэньні „саюзнай дзяржавы“, ні ад аднаго пункту гэтай дамовы мы не адмаўляемся, — адказаў Лукашэнка на пытаньне аб разьвіцьці саюзу з Расеяй. — Нават возьмем самы сур'ёзны [пункт], які сёньня абмяркоўваецца. Дапусьцім, адзіная валюта. Мы ня супраць адзінай валюты, але толькі гэта павінна быць нэўтральная валюта. Гэта не беларускі рубель, не расейскі».
Паводле Лукашэнкі, «не пытаньне, які гэта будзе рубель», але пытаньне ў тым, дзе будзе эмісійны цэнтар і хто ім будзе кіраваць, ці будзе гэтае кіраваньне на роўных умовах для Беларусі і Расеі:
«Паколькі Расея вялікая, яна будзе кіраваць сваім рублём, а мы свой ліквідуем і да іх далучымся? — спытаў Лукашэнка. — Мы гэта ўжо праходзілі ў першыя гады пасьля распаду Савецкага Саюзу, калі нас проста выкінулі з рублёвай зоны. І, у рэшце рэшт, мы засталіся з савецкімі рублямі, яны ўвялі расейскі рубель, а мы потым малявалі „зайчыкі“. Я не хачу гэта паўтараць. Гэта па-першае. А па-другое, дзе ж тут тады будзе наш сувэрэнітэт?»
Пасьля распаду СССР у Расеі савецкі рубель заставаўся ў абароце да 1993 году, але ў сьнежні 1991-га зьявіўся ўласны расейскі рубель, які быў у абароце паралельна. Безнаяўныя разьлікі ў беларускіх рублях пачаліся ад 1 ліпеня 1992 году. У Беларусі савецкі рубель пачалі выводзіць з абароту ў ліпені 1993 году і замяняць яго беларускім — да таго была сыстэма купонаў (ад 1992 году) і разьліковых білетаў Нацыянальнага банку.
«Паглыбленьне інтэграцыі» Беларусі і Расеі. Што важна ведаць
- Урады Беларусі і Расеі зьбіраліся ўзгадніць 31 стратэгічны плян інтэграцыі. Паволе расейскага прэм’ер-міністра Дзьмітрыя Мядзьзведзева, няўзгодненым застаўся 1 плян — пра наднацыянальныя органы.
- Што менавіта зьбіраюцца падпісаць Лукашэнка і Пуцін, а таксама на што пагадзіліся ўрады ў стратэгічных плянах, публічна не агучваецца.
- Тэма «паглыбленьня інтэграцыі» пачалася зь перамоваў пра кампэнсацыю «падатковага манэўру». Але ў «праграме інтэграцыі» няма кампэнсацыі «падатковага манэўру», бюджэт разьлічылі безь яе.
- У канцы 2018 году Мядзьведзеў заявіў, што Расея гатовая «праводзіць адзіную палітыку ў галіне падаткаў, цэна- і тарыфаўтварэньня» толькі тады, калі будуць выкананыя ўмовы пагадненьня аб «саюзнай дзяржаве» 1999 году — а гэта агульныя валюта, суд і мытня.
- Гэтыя ўмовы празвалі «ўльтыматумам Мядзьведзева». Аляксандар Лукашэнка тады адказаў жорстка: маўляў, «шантажаваць марна. Разумею намёкі — уступайце ў склад Расеі. Гэтага ня будзе ніколі».
- 19 сьнежня 2019 году Ўладзімір Пуцін заявіў, што зь Беларусьсю абмяркоўваюць стварэньне наднацыянальных органаў — кантрольнага і эмісійнага. 23 сьнежня Мядзьведзеў паўтарыў, што без наднацыянальных органаў ня будзе кампэнсацыі «падатковага манэўру» і іншай дапамогі Беларусі.
- 17 лістапада Лукашэнка абурыўся тым, што расейцы «кожны раз падсоўваюць новыя ўмовы, у выніку мы ў эканоміцы нешта страчваем», і рытарычна спытаў: «На храна патрэбен такі саюз?».
- Шэраг беларусаў лічаць, што «паглыбленьне інтэграцыі» ўсё ж можа прывесьці да страты незалежнасьці Беларусі. Палітыкі і культурныя дзеячы прынялі 1 сьнежня сумесную заяву «Аб пагрозе Незалежнасьці Беларусі», а 4 сьнежня супраць інтэграцыі выступілі беларускія Telegram-каналы і суполкі «Ўкантакце».
- Акцыі супраць паглыбленьня інтэграцыі Беларусі і Расеі прайшлі ў Менску 7, 8, 20 і 21 сьнежня. А таксама ў Горадні, Пінску, Лідзе. За мяжой — у Польшчы, Украіне, Літве, Чэхіі, Вугоршчыне, Бэльгіі, Ізраілі, ЗША, Канадзе.
-
Агульная сума штрафаў пратэстоўцам — каля 65 тысяч даляраў. Таксама ўдзельнікам акцый прысудзілі агулам 375 сутак арышту.
- 24 сьнежня ў інтэрвію «Эхо Москвы» Лукашэнка заявіў, што акцыі супраць «паглыбленьня інтэграцыі» не былі масавымі («400 чалаек — гэта наша ядро апазыцыі»), і «нехта падказаў, аплаціў, фонды ім даюць прыстойныя грошы». Лукашэнка дадаў, што сам ня пойдзе на тое, «ад чаго яны спрабуюць усьцерагчы беларускі народ», і назваў сябе «галоўны абаронца сувэрэнітэту і незалежнасьці».
Спэцпрапект «Чаму Беларусь не Расея»
