Група беларускіх мастакоў ня зможа ў прызначаны тэрмін вярнуцца з Чарнагорыі, паведамляе «Народная Воля».
Чацьвёра беларускіх мастакоў — Аляксей Марачкін, Натальля Піневіч, Алесь Фалей і Настасься Патворава — прыехалі ў Чарнагорыю на пачатку сакавіка. Месячны пленэр у гарах арганізаваў тутэйшы бізнэсовец Ратка Паповіч, які забясьпечыў беларусаў жыльлём і харчаваньнем. Наўзамен, паводле папярэдніх дамоўленасьцяў, возьме ў дар іх карціны.
У Менск творцы павінны былі вярнуцца не пазьней за 3 красавіка. Але ад’езд адкладаецца як мінімум на 20 дзён, бо на час карантыну авіязносіны з Чарнагорыяй спыненыя. Як паведаміў выданьню Ігар Марачкін, сын Аляксея Антонавіча, бацька з галавой сышоў у працу, таму такая затрымка яго толькі ўзрадавала.
«Краіна праз каранавірус абязьлюднела: гатэлі на ўзьбярэжжы не працуюць, кавярні зачыненыя, дарогі на пляж перакрытыя. Застаюцца толькі горы. Там выпаў вялікі сьнег. Але бацька радуецца: нарэшце з кветак, з натурмортаў пяройдзе на зімовыя краявіды. Засумаваў па сьнезе», — расказаў Ігар Марачкін.
У Чарнагорыі зарэгістраваныя 22 выпадкі заражэньня COVID-19, пад наглядам 5565 чалавек. 65-гадовы мужчына, у якога было хранічнае захворваньне лёгкіх, памёр некалькі дзён таму.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
