Межы краін — суседак Беларусі цяпер закрытыя. Ад гэтага цярпіць ня толькі турыстычная і транспартная сфэра. Разьбіраемся з эканамістамі, якія галіны эканомікі пандэмія закране найбольш.
Пацярпяць турыстычныя фірмы, транспарт і лягістыка
Авіякампанія «Белавія» прыпыняе палёты ў 30 краін, стаіць амаль уся турыстычная сфэра, бо межы для турыстаў закрытыя ва ўсіх краінах — суседках Беларусі. Глядзім, хто і якія страты нясе ад пандэміі.
У авіякампаніі «Белавія» карэспандэнту Свабоды паведамілі, што «страты кампаніі — гэта камэрцыйная тайна». Не падлічвалі стратаў пакуль і ў турыстычнай сфэры. У Саюзе турыстычных арганізацый параілі «пагаварыць пра гэта праз тыдзень», бо пакуль страты падлічыць немагчыма.
За мінулы год прыбытак усіх турыстычных арганізацый Беларусі склаў 28,2 мільёна рублёў. Калі ўся сфэра ня будзе працаваць два тыдні — гэта каля 1 мільёна стратаў. Але як паведамляюць прадстаўнікі сфэры, турызм — гнуткая галіна эканомікі і ўсе страты можна «адбіць» у сэзон.
Страты зазнае таксама лягістычная сфэра. Пакуль праз закрытыя межы грузавікі з таварамі прапускаюць, але колькасьць пунктаў пропуску зьменшаная. Як паведамілі Свабодзе прадстаўнікі гэтай сфэры, «страты падлічыць пакуль складана, але яны будуць, бо на мяжы растуць чэргі».
«У сьвеце зьнізіцца попыт на стратэгічныя для Беларусі тавары»
Продаж нафтапрадуктаў і калійных угнаеньняў — стратэгічныя крыніцы даходу для беларускага бюджэту. Няўстойлівасьць нафтавых паставак і так ударыла па даходах Беларусі, а каранавірус можа значна ўскладніць сытуацыю. На гэта зьвяртае ўвагу кіраўнік цэнтру «Мізэса» Яраслаў Раманчук.
«Асноўны стрэл будзе ў тое, што попыт на нашы калійныя ўгнаеньні, нафтапрадукты і мэталы будзе скарочаны, бо зьменіцца сусьветная каньюнктура. Калі эканоміка ў краінах будзе на нулі, яны будуць менш купляць угнаеньняў, нафтапрадуктаў. Будзе большая канкурэнцыя, зьнізяцца цэны на нафтапрадукты і ўгнаеньні, адпаведна, мы заробім менш грошай», — кажа Яраслаў Раманчук.
Калі цэны на гэтыя стратэгічныя прадукты зьнізяцца на 15-20%, настолькі ж зьнізіцца даход ад экспарту, мяркуе Яраслаў Раманчук.
Больш за тое, эпідэмія можа закрануць любое прадпрыемства. Напрыклад, цяпер у Віцебску карантын увялі на фабрыках «Чырвоны кастрычнік» і «Белвест». Несупрацоўнікам на гэтыя фабрыкі ўваход забаронены. Вядома, што гендырэктар холдынгу «Марка», у які ўваходзіць «Чырвоны кастрычнік», на бальнічным, але паведамляецца, што каранавірусу ў яго няма.
Калі на буйным прадпрыемстве чалавек захварэе на каранавірус, там таксама могуць увесьці карантын ці прыпыніць працу, што прывядзе да стратаў.
Хто заробіць на каранавірусе
На прасторы інтэрнэту гуляюць мэмы, што на каранавірусе заробяць уладальнікі аптэк, крамаў і службаў дастаўкі ежы. Напрыклад, агульны аб’ём службы дастаўкі «Эўраопту» вырас утрая. Але паводле Яраслава Раманчука, значным прыбыткам гэта ня стане.
«Яны выкарыстаюць усе свае запасы, але пасьля, калі ад усёй сытуацыі ў людзей зьнізяцца даходы, адпаведна скароцяцца выдаткі на спажывецкія тавары. І калі ў гэтым месяцы яны зарабілі, то пазьней проста заробяць значна менш. То бок гэты даход разыдзецца ў будучыні», — расказвае Яраслаў Раманчук.
Калі ў Францыі і іншых краінах ужо заявілі аб скарачэньні падаткаў у сувязі з пандэміяй і аб фінансавай падтрымцы для бізнэсу ад дзяржавы, то ў Беларусі пра такія захады не чуваць. Пры гэтым, на думку экспэртаў, даходы прадпрыемстваў і адпаведна людзей праз пандэмію скароцяцца. Значыць, скароцяцца і іхныя выдаткі.
Што трэба ведаць пра новы каранавірус COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
