Яшчэ ў сьнежні 2019 году ў Беларусі пачалі судзіць удзельнікаў пратэстаў супраць паглыбленьня інтэграцыі з Расеяй. У ліку тых, каго меліся судзіць, быў і лідэр руху салідарнасьці «Разам» Вячаслаў Сіўчык. Але прысуды Сіўчыку адкладалі, бо падсудны быў за мяжой.
У судзе Партызанскага раёну Менску 3 лютага прайшоў чарговы суд над Вячаславам Сіўчыкам. Судзьдзя Аляксандар Барысёнак, як піша «Вясна», не перанёс паседжаньне, а абвясьціў вырак: 15 сутак арышту за «парушэньне парадку правядзеньня масавых мерапрыемстваў».
«Пракурор сам мусіў бы абскардзіць»
Самога Сіўчыка на паседжаньні не было. Палітык пацьвердзіў Свабодзе, што ён і цяпер за мяжой. Ён адзначыў, што ранейшыя суды пераносіліся, бо, паводле зьвестак суду, ён быў за мяжой, але зьдзівіўся: «Адкуль у суду такія зьвесткі?»
«Сам завочны вырак — натуральна, надзвычай грубае парушэньне беларускага заканадаўства, — кажа Сіўчык Свабодзе. — Гэта палітычна матываваныя рэпрэсіі, і гэта зразумела чаму зроблена: хочуць запалохаць мяне, хочуць запалохаць беларускае грамадзтва. Карная сыстэма Аляксандра Лукашэнкі ўсё больш ператвараецца ў нейкіх пуцінскіх халуёў».
На думку Сіўчыка, выракам яму «было растаптанае і беларускае заканадаўства, і міжнародныя пагадненьні, якія заключала Рэспубліка Беларусь».
Ён адзначае, што вырак вынесьлі «адразу, як толькі дзяржаўны сакратар Злучаных Штатаў Амэрыкі Майк Пампэо пакінуў тэрыторыю Рэспублікі Беларусь».
Па вяртаньні ў Беларусь Сіўчыка могуць затрымаць і пасадзіць, ня даўшы магчымасьці абскардзіць вырак. Ён кажа, што будзе вяртацца ў Беларусь, нягледзячы на гэта.
«Між іншым, пракурор Партызанскага раёну сам павінен абскардзіць гэты прысуд, — кажа Сіўчык. — Нават без маіх заяваў павінен быў бы абскардзіць, бо прысуд цалкам незаконны, не ўкладаецца ў беларускае заканадаўства. Але паглядзім. У нас жа далей гэты тэатар абсурду будзе працягвацца».
Акрамя гэтага суду за акцыю 8 сьнежня, яго чакаюць яшчэ чатыры працэсы ў судзе Партызанскага раёну — штодзень да 7 лютага.
За сьнежаньскія акцыі раней 13 чалавек былі асуджаныя агулам на 345 сутак арышту, аштрафаваныя на 129 тысяч рублёў.
«Паглыбленьне інтэграцыі» Беларусі і Расеі. Што важна ведаць
- Урады Беларусі і Расеі зьбіраліся ўзгадніць 31 стратэгічны плян інтэграцыі. Паволе расейскага прэм’ер-міністра Дзьмітрыя Мядзьзведзева, няўзгодненым застаўся 1 плян — пра наднацыянальныя органы.
- Што менавіта зьбіраюцца падпісаць Лукашэнка і Пуцін, а таксама на што пагадзіліся ўрады ў стратэгічных плянах, публічна не агучваецца.
- Тэма «паглыбленьня інтэграцыі» пачалася зь перамоваў пра кампэнсацыю «падатковага манэўру». Але ў «праграме інтэграцыі» няма кампэнсацыі «падатковага манэўру», бюджэт разьлічылі безь яе.
- У канцы 2018 году Мядзьведзеў заявіў, што Расея гатовая «праводзіць адзіную палітыку ў галіне падаткаў, цэна- і тарыфаўтварэньня» толькі тады, калі будуць выкананыя ўмовы пагадненьня аб «саюзнай дзяржаве» 1999 году — а гэта агульныя валюта, суд і мытня.
- Гэтыя ўмовы празвалі «ўльтыматумам Мядзьведзева». Аляксандар Лукашэнка тады адказаў жорстка: маўляў, «шантажаваць марна. Разумею намёкі — уступайце ў склад Расеі. Гэтага ня будзе ніколі».
- 19 сьнежня 2019 году Ўладзімір Пуцін заявіў, што зь Беларусьсю абмяркоўваюць стварэньне наднацыянальных органаў — кантрольнага і эмісійнага. 23 сьнежня Мядзьведзеў паўтарыў, што без наднацыянальных органаў ня будзе кампэнсацыі «падатковага манэўру» і іншай дапамогі Беларусі.
- 17 лістапада Лукашэнка абурыўся тым, што расейцы «кожны раз падсоўваюць новыя ўмовы, у выніку мы ў эканоміцы нешта страчваем», і рытарычна спытаў: «На храна патрэбен такі саюз?».
- Шэраг беларусаў лічаць, што «паглыбленьне інтэграцыі» ўсё ж можа прывесьці да страты незалежнасьці Беларусі. Палітыкі і культурныя дзеячы прынялі 1 сьнежня сумесную заяву «Аб пагрозе Незалежнасьці Беларусі», а 4 сьнежня супраць інтэграцыі выступілі беларускія Telegram-каналы і суполкі «Ўкантакце».
- Акцыі супраць паглыбленьня інтэграцыі Беларусі і Расеі прайшлі ў Менску 7, 8, 20 і 21 сьнежня. А таксама ў Горадні, Пінску, Лідзе. За мяжой — у Польшчы, Украіне, Літве, Чэхіі, Вугоршчыне, Бэльгіі, Ізраілі, ЗША, Канадзе.
-
Агульная сума штрафаў пратэстоўцам — каля 65 тысяч даляраў. Таксама ўдзельнікам акцый прысудзілі агулам 375 сутак арышту.
- 24 сьнежня ў інтэрвію «Эхо Москвы» Лукашэнка заявіў, што акцыі супраць «паглыбленьня інтэграцыі» не былі масавымі («400 чалаек — гэта наша ядро апазыцыі»), і «нехта падказаў, аплаціў, фонды ім даюць прыстойныя грошы». Лукашэнка дадаў, што сам ня пойдзе на тое, «ад чаго яны спрабуюць усьцерагчы беларускі народ», і назваў сябе «галоўны абаронца сувэрэнітэту і незалежнасьці».
Спэцпрапект «Чаму Беларусь не Расея»
