Прэсавая сакратарка Дзярждэпартамэнту ЗША Морган Артагус выступіла з адмысловай заявай, у якой выклала ацэнку Злучанымі Штатамі парлямэнцкіх выбараў, якія адбыліся ў Беларусі.
— ЗША прызнаюць мірнае правядзеньне парлямэнцкіх выбараў у Беларусі 17 лістапада і вялікую колькасьць акрэдытаваных мясцовых і міжнародных назіральнікаў.
Аднак місіі па назіраньні за выбарамі сумесна прыйшлі да высновы, што «фундамэнтальныя свабоды былі праігнараваныя і сумленнасьць выбарчага працэсу не была адэкватна абароненая». Бюро па дэмакратычных інстытутах і правах чалавека (БДІПЧ) АБСЭ, Парлямэнцкая асамблея АБСЭ і Рада Эўропы выказалі вялікую заклапочанасьць гэтымі выбарамі.
Мы выказваем шкадаваньне, што альтэрнатыўныя галасы ня будуць прадстаўленыя ў парлямэнце.
Да парлямэнцкіх выбараў у Беларусі ёсьць сурʼёзныя пытаньні наконт перашкодаў у рэгістрацыі партый, адмены рэгістрацыі кандыдатаў у дэпутаты, сумленнасьці працэсу датэрміновага галасаваньня, непразрыстай сыстэмы падліку галасоў, адсутнасьці плюралізму ў складзе выбарчых камісій, крымінальных санкцый за паклёп, абмежаваньняў на працу мэдыя і прававой базы.
Мы адзначаем, што не адбылося зьмястоўных зьменаў выбарчага працэсу, прапановы па якіх падавалі БДІПЧ АБСЭ і Вэнэцыянская камісія Рады Эўропы. Мы працягваем заклікаць урад Беларусі правесьці сурʼёзную рэформу свайго выбарчага закону і выбарчага працэсу ў адпаведнасьці з парадамі БДІПЧ АБСЭ і Вэнэцыянскай камісіі Рады Эўропы.
Умацаваньне дэмакратыі ў Беларусі дазволіць умацаваць беларускі сувэрэнітэт і незалежнасьць, якія ЗША адназначна і рашуча падтрымліваюць, і пракласьці шлях да ўмацаваньня двухбаковых сувязей.
