Сёньня каля 19.00 на электронную пошту кол-цэнтра Магілёўскага аддзяленьня Беларускай Чыгункі паступіла паведамленьне аб небясьпецы на аб’ектах у Менску: гандлёвых цэнтрах «Замак», «Дана Мол», «Галілеа», а таксама Цэнтральным чыгуначны вакзале, інфармуе прэс-служба МУС.
«Сапёрнай-піратэхнічныя групы праводзяць абсьледаваньне названых абʼектаў на наяўнасьць небясьпечных прадметаў», — гаворыцца ў паведамленьні, распаўсюджаным праз Тэлеграм.
Супрацоўнікі міліцыі эвакуавалі наведнікаў гэтых абʼектаў. Кадры эвакуацыі апублікавалі ў сваіх профілях некаторыя блогеры.
Празь некалькі гадзінаў МУС паведаміла, што абсьледаваньне трох гандлёвых цэнтраў і чыгуначнага вакзала ў Менску завершанае. Падазроных і небясьпечных прадметаў не выяўлена.
Што важна ведаць пра «мінаваньне» будынкаў у Беларусі
Ад пачатку 2019 году за ілжывае мінаваньне будынкаў па ўсёй Беларусі завялі 35 крымінальных спраў. У ходзе іх расьсьледаваньня ўсталявалі 14 чалавек, датычных да падобных паведамленьняў, па шасьці крымінальных справах ужо прайшлі суды і вынесеныя прысуды. Расьсьледаваньні працягваюцца.
- 31 сакавіка невядомы паведаміў, нібыта замінаваны чыгуначны вакзал, а таксама гандлёвыя цэнтры Galileo і «Замак».
- 6 красавіка праз тэлефон сказалі, што ў гандлёвым цэнтры «Галерэя» закладзена выбухоўка.
- 27 красавіка абмежавалі рух менскага мэтро з прычыны «замінаваньня» станцыі «Ўручча». Пазьней увечары затрымалі чалавека, які меркавана зрабіў ілжывы званок.
- 29 красавіка паведамлялася пра «мінаваньне» аэрапорту, вакзалу і гатэля ў Менску.
У 2018 годзе ў Беларусі міліцыя зафіксавала 23 ілжывых «паведамленьня аб небясьпецы», піша МУС Беларусі.
Паводле арт. 340 Крымінальнага кодэксу заведама ілжывае паведамленьне аб небясьпецы можа карацца:
- штрафам ці арыштам;
- да 5 гадоў абмежаваньня волі;
- ад 3 да 7 гадоў пазбаўленьня волі.
