Эканамічны суд суд Берасьцейскай вобласьці аштрафаваў жыхара Пінскага раёну за тое, што ён за грошы набіраў спадарожнікаў праз сайт blablacar.ru.
У падатковай інспэкцыі вывучылі ягоны профіль на сайце і налічылі 80 паездак.
Колькі зарабіў паляшук на паездках, падатковікі ня высьветлілі.
За прадпрымальніцкую дзейнасьць без рэгістрацыі суд пакараў кіроўцу штрафам — 127 рублёў 50 капеек.
Машыну ў яго не сканфіскавалі, бо ён трапіўся праваахоўнікам упершыню і прызнаў віну.
Летась у Берасьцейскай вобласьці разгледзелі 40 падобных справаў, сёлета — 13. Найчасьцей судзілі кіроўцаў, што карысталіся аплікацыяй TaxeeDriver, а таксама сайтамі beepcar.ru і blablacar.ru. Машыны ні ў кога не сканфіскавалі.
