Дэлегацыю Злучаных Штатаў Амэрыкі на інаўгурацыі новаабранага прэзыдэнта Ўкраіны Ўладзіміра Зяленскага ўзначаліць міністар энэргетыкі ЗША Рык Пэры.
У складзе дэлегацыі таксама прыедуць
- спэцыяльны прадстаўнік Дзярждэпартамэнту ЗША ў пытаньнях Украіны Курт Волкер,
- пасол ЗША ў Эўразьвязе Гордан Сондланд,
- дырэктар дэпартамэнту эўрапейскіх спраў у Радзе нацыянальнай бясьпекі ЗША пры прэзыдэнце Аляксандар Відман,
- выканаўца абавязкаў кіраўніка дыпляматычнай місіі ЗША ва Ўкраіне Джозэф Пэнінгтан.
Курт Волкер заявіў, што «зь нецярпеньнем чакае нагоды падзякаваць Парашэнку за цесную супрацу паміж ЗША і Ўкраінай, а таксама нагоды працаваць над працягам гэтай супрацы з прэзыдэнтам Зяленскім».
У 2014 годзе на інаўгурацыі прэзыдэнта Ўкраіны Пятра Парашэнкі Злучаныя Штаты прадстаўляла дэлегацыя вышэйшага ўзроўню — на чале з тагачасным віцэ-прэзыдэнтам ЗША Джо Байдэнам.
Інаўгурацыя новага прэзыдэнта Ўкраіны пройдзе 20 траўня а 10-й гадзіне.
Таксама на цырымоніі інаўгурацыі новага прэзыдэнта Ўкраіны Ўладзіміра Зяленскага чакаюць прэзыдэнтаў Вугоршчыны, Грузіі, Латвіі, Літвы, Эстоніі. Ад Беларусі чакаюць віцэ-прэм’ера.
