Кіраўніца адміністрацыі прэзыдэнта Натальля Качанава патрабуе ад гомельскіх уладаў «мабілізаваць працоўныя калектывы для рашэньня пастаўленых задач Кіраўніком дзяржавы па пытаньнях сацыяльна-эканамічнага разьвіцьця краіны». Дакумэнт з назвай «Аб навядзеньні парадку» Свабодзе даслалі чытачы.
Ліст з адміністрацыі прэзыдэнта за подпісам Натальлі Качанавай дасланы ў Гомельскі аблвыканкам на імя першага намесьніка старшыні Генадзя Салаўя. Былы кіраўнік вобласьці Ўладзімер Дворнік нядаўна прызначаны віцэ-прэм’ерам, таму рэгіён пакуль фармальна застаецца пад кіраўніцтвам першага намесьніка.
«У чарговы раз зьвяртаю вашу ўвагу на неабходнасьць выкананьня на месцах працоўнай і выканаўчай дысцыпліны, выкананьня ўсіх неабходных тэхнічных і тэхналягічных рэглямэнтаў пры вытворчасьці прадукцыі, а таксама навядзеньня парадку на працоўных месцах, аб’ектах і тэрыторыях прадпрыемстваў усіх формаў уласнасьці ў рэгіёне», — нагадала Качанава першаму намесьніку старшыні аблвыканкаму.
Кіраўніца адміністрацыі патрабуе «мабілізаваць працоўныя калектывы» і просіць «правесьці работу з насельніцтвам па месцы жыхарства для навядзеньня парадку на тэрыторыях пры дамах».
Пра вынікі яна просіць «ва ўстаноўленым парадку інфармаваць Кіраўніка дзяржавы з улікам даручэньня ад 24.07.2018».
Качанава зьвяртае ўвагу, што пэрсанальная адказнасьць за навядзеньне парадку ўскладзена на старшынь «абл-, рай-, і гарвыканкамаў».
