Памятную дошку павесілі на доме па вуліцы Ажэшкі, дзе 14 гадоў жыў пісьменьнік.
Знак вырабілі з ініцыятывы і за сродкі сваякоў Аляксея Карпюка. Горадзенскі скульптар Уладзімер Панцялееў працаваў над ім чатыры месяцы. Ён зроблены з граніту і бронзы. Гістарычную даведку і абгрунтаваньне падрыхтаваў гісторык Андрэй Вашкевіч.
«У гэтым доме з 1962 па 1976 год жыў і працаваў беларускі пісьменьнік, франтавік і грамадзкі дзяяч Аляксей Карпюк», — напісана на дошцы.
На адкрыцьці прысутнічалі дачка славутага гарадзенца Валянціна Карпюк, мовазнаўца Аляксей Пяткевіч, паэткі Данута Бічэль і Ала Петрушкевіч, гісторыкі, грамадзкія актывісты.
Ушанаваць пісьменьніка дазволілі гарадзкія ўлады, эскіз шыльды ўзгаднілі ў Міністэрстве культуры.
Сёлета 14 красавіка Аляксею Карпюку споўнілася б 99 гадоў. Ён нарадзіўся ў вёсцы Страшава паблізу ад Беластоку (цяпер тэрыторыя Польшчы). У 1942 годзе трапіў у нямецкі канцлягер, адкуль уцёк. Быў камандзірам партызанскага атраду.
Аўтар твораў пра жыцьцё Заходняй Беларусі. У 1960–1970-я гады ўваходзіў у клюб вольнай інтэлігенцыі Горадні разам з Васілём Быкавым, Данутай Бічэль.
Пасьля вайны каля 50 гадоў пражыў у Горадні. Памёр у 1992 годзе, пахаваны на горадзенскіх могілках. Імя Карпюка носіць адна з вуліц гораду.
