Прэзыдэнт Францыі Эмануэль Макрон распарадзіўся адкрыць дзяржаўныя архівы для дасьледаваньня генацыду ў Руандзе ў 1994 годзе. Ён выступіў у Елісейскім палацы на сустрэчы зь сябрамі арганізацыі «Ібука», створанай для захаваньня памяці пра ахвяры генацыду.
Паводле Макрона, пасьля адкрыцьця архіваў будзе створана камісія гісторыкаў, якія дасьледуюць дакумэнты, зьвязаныя з адносінамі францускага ўраду з Руандай у пачатку 1990-х гадоў. Навукоўцы маюць намер дэталёва дасьледаваць факты падтрымкі, якую Францыя аказвала прэзыдэнту Жувеналу Хабіарыману. Менавіта гібель гэтага палітыка стала штуршком да пачатку генацыду.
Эмануэль Макрон паабяцаў узмацніць законы, якія дазволілі б прыцягнуць да адказнасьці асобаў, якія маюць дачыненьне да генацыду, калі такія людзі знаходзяцца на тэрыторыі Францыі.
6 красавіка праз 25 гадоў пасьля пачатку хвалі генацыду, у Руандзе ўспамінаюць загінулых тутсі. Прэзыдэнт Руанды Пол Кагамэ запрасіў Макрона паўдзельнічаць у афіцыйных мерапрыемствах у Кігалі. Прэзыдэнт Францыі, аднак, адмовіўся прыехаць, спаслаўшыся на занадта напружаны графік.
У 1994 годзе ў выніку масавых выпадкаў гвалту загінулі не менш за 800 тысяч тутсі, або 70 працэнтаў прадстаўнікоў гэтай нацыянальнай меншасьці ў Руандзе. Гэтыя падзеі прызнаныя генацыдам Арганізацыяй Аб’яднаных Нацый.
Іх пачаткам лічыцца гібель прэзыдэнта Руанды Жувенала Хабіарыманы, які быў прадстаўніком колькасна пераважнай народнасьці хуту. 6 красавіка 1994 году Хабіарымана загінуў у авіякатастрофе. Па выніках сьледзтва, праведзенага францускай пракуратурай, загад зьбіць самалёт прэзыдэнта выдаў цяперашні прэзыдэнт Руанды і прадстаўнік меншасьці тутсі Пол Кагамэ. У 1994 годзе ён быў лідэрам узброенага супраціву Хабіарыману. Сваё дачыненьне да замаху на былога прэзыдэнта Кагамэ адмаўляе.
