У Магілёве расьсьледуюць крымінальную справу адносна двух хлопцаў і дзяўчыны, якія шукалі ў інтэрнэце «нацыстаў» і прызначалі ім сустрэчу, каб правучыць.
Пачатая справа аб хуліганстве і незаконным пазбаўленьні волі. Хлопцы, якім 21 і 27 гадоў, узятыя пад варту, а 19-гадовая дзяўчына цяпер пад хатнім арыштам.
Пра гэта паведамілі tut.by у абласным упраўленьні Сьледчага камітэту.
У жніўні 2018 году маладыя людзі пасьля перапіскі ў інтэрнэце сустрэліся з 17-гадовым хлопцам у двары дома. Пырснулі зь пярцовага балёнчыка, а пасьля зацягнулі падлетка ў закінутую адрыну, сілком яго там утрымлівалі, пагражалі расправай.
Хлопцы датычныя яшчэ як мінімум да двух падобных эпізодаў. Паводле БелТА, у сацыяльнай сетцы падазраваныя знаходзілі маладых людзей, якія нібыта прытрымліваюцца нацысцкіх поглядаў, і прызначалі ім сустрэчы. Яны распылялі ім у вочы вадкасьць з газавага балёнчыка і зьбівалі іх.
