Прэзыдэнт ЗША Дональд Трамп заявіў, што расейскія вайскоўцы павінны пакінуць Вэнэсуэлу. Гэта адбылося пасьля таго, як Масква прыслала войскі і абсталяваньне ў лацінаамэрыканскую краіну, якая перажывае глыбокі крызіс.
«Расея павінна адтуль выбірацца», — сказаў Трамп рэпарцёрам падчас сустрэчы з жонкай лідэра вэнэсуэльскай апазыцыі Хуана Гуайдо, прызнанага ЗША і больш чым 50 краінамі часовым прэзыдэнтам Вэнэсуэлы.
Сярод прыбыўшых у Вэнэсуэлу 24 сакавіка расейскіх вайскоўцаў ёсьць спэцыялісты сілаў спэцыяльнага прызначэньня, у прыватнасьці па кібэрбясьпецы, паведамляе агенцтва Reuters са спасылкай на крыніцу ва ўрадзе ЗША.
У Вашынгтоне лічаць, што ў іх задачы ўваходзіць падтрымка ляяльных рэжыму Нікаласа Мадура сілаў сачэньня і аховы ўрадавай кібэрінфраструктуры.
24 сакавіка ў сталіцу Вэнэсуэлы Каракас прыбылі два самалёты Міністэрства абароны Расеі — Іл-62 і адзін з найбуйнейшых транспартных самалётаў у сьвеце Ан-124. Паводле інфармацыі СМІ, двума самалётамі ў Вэнэсуэлу былі дастаўленыя сотні расейскіх вайскоўцаў і каля 35 тон грузу.
Канкрэтная прычына візыту расейскіх вайскоўцаў у Вэнэсуэлу невядомая, хоць Каракас і Масква ў сьнежні заявілі, што пачнуць абмеркаваньне сумесных намаганьняў для павышэньня абароназдольнасьці лацінаамэрыканскай краіны.
