Помнік прэзыдэнту Францыі Шарлю дэ Голю плянуюць паставіць у Шчучыне ў 2020 годзе да 130-годзьдзя з дня нараджэньня гістарычнай асобы, паведамляе grodnonews.by.
Пра гэта дамовіліся падчас нядаўняга візыту ў Шчучын амбасадара Францыі ў Беларусі Дзідзье Канэса.
У гады Першай усясьветнай вайны — зь ліпеня па верасень 1916-га — Шарль дэ Голь знаходзіўся ў нямецкім лягеры для ваеннапалонных на тэрыторыі сучаснага Шчучына.
Зараз на гэтым месцы стаіць цэх аўтатрактарных камплектаў заводу «Аўтапровад». Менавіта на гэтым будынку ўжо сёлета будзе адкрытая памятная дошка. А ў пэрспэктыве тут разьмесьціцца інтэрактыўны музэй.
«Тэма прысутнасьці ў Шчучыне Шарля дэ Голя вельмі цікавая і важная для далейшага разьвіцьця турыстычнай прывабнасьці рэгіёну. Пагатоў Шчучын неўзабаве ўвойдзе ў бязьвізавую зону. Упэўнены, што шчучынскі сьлед генэрала прыцягне ў наш горад шмат турыстаў і пасадзейнічае збліжэньню нашых народаў», — адзначыў старшыня Шчучынскага райвыканкаму Сяргей Ложачнік.
