Пагадненьне аб льготным крэдыце для будаўніцтва завода па вытворчасьці спэцыяльных машын у Калодзішчах будзе скасавана «ў якасьці асновы для правядзеньня перамоваў».
Гэта вынікае з пастановы Савету Міністраў, якая апублікаваная на партале pravo.by.
Савет Міністраў ухваліў праект пагадненьня аб скасаваньні крэдытнага пагадненьня.
Пагадненьне аб выдзяленьні льготнага пакупніцкага крэдыту паміж урадам і Экспартна-імпартным банкам Кітаю было падпісана 15 траўня 2017 году.
Савет Міністраў упаўнаважыў Міністэрства фінансаў правесьці перамовы аб праекце пагадненьня. У пастанове дазволена пры неабходнасьці ўносіць у яго зьмены, «якія ня маюць прынцыповага характару».
Урад плянаваў прыцягнуць у 2017–2022 гадах ільготны пакупніцкі крэдыт Экспартна-імпартнага банку Кітаю тэрмінам на 18 гадоў для будоўлі заводу ў Калодзішчах на 192,7 млн даляраў.
8 траўня мінулага году ў Калодзішчах урачыста заклалі капсулу ў падмурак будучага заводу, будоўля распачалася.
Ці спыніць гэта будаўніцтва заводу?
Ці азначае цяперашняя пастанова, што будаўніцтва новага заводу «Амкадор» у Калодзішчах, супраць якога пратэставалі мясцовыя жыхары, якія лічаць яго экалягічна шкодным, будзе спынена? На гэтае пытаньне ў кампаніі «Амкадор» карэспандэнту Свабоды не адказалі.
«Гэта пытаньне першай асобы, галоўнага акцыянэра. Цяпер ён у дзелавой камандзіроўцы. Мы спрабуем зь ім зьвязацца, але пакуль у нас не атрымалася. А камэнтаваць гэтае сур’ёзнае пытаньне ад імя прэс-службы я не магу», — сказаў кіраўнік прэс-службы ААТ «„Амкадор“ — кіроўная кампанія холдынгу» Аляксандар Маліноўскі.
Ён адзначыў, што «праект быў буйны і закладаўся зь вялікімі мэтамі».
Мінфін: «Мы атрымалі рашэньне, што ім немэтазгодна выкарыстоўваць гэтыя сродкі»
У Міністэрстве фінансаў карэспандэнта Свабоды пераадрасавалі ў «Амкадор».
«Мы толькі тэхнічна суправаджалі пагадненьне. І па іх рашэньні мы цяпер яго спыняем. Удакладняйце ў „Амкадора“ аб прычынах невыкарыстаньня гэтых сродкаў. Мы атрымалі ад іх рашэньне, што ім немэтазгодна выкарыстоўваць гэтыя сродкі», — сказала прэс-сакратарка Мінфіну Ірына Комар.
