Дзяржсакратар ЗША Майк Пампэа заклікаў удзельнікаў Рады бясьпекі ААН падтрымаць апазыцыйнага лідэра Хуана Гуайдо.
Расея, Кітай, ПАР і Экватарыяльная Гвінэя заблякавалі ў суботу спробу ЗША прыняць у Радзе бясьпекі ААН рэзалюцыю ў падтрымку вэнэсуэльскай Нацыянальнай асамблеі (парлямэнту, апазыцыйнага рэжыму Мадура). У рэзалюцыі гаворыцца, што ААН прызнае Нацыянальную асамблею ў якасьці «адзінага дэмакратычна абранага інстытуту» у Вэнэсуэле.
Гэтае пытаньне зьявіўся на парадку дня напярэдадні пазачарговага суботняга пасяджэньня Рады бясьпекі ААН, скліканага зь ініцыятывы ЗША. Вашынгтон і многія лацінаамэрыканскія дзяржавы прызналі лідэра апазыцыі Хуана Гуайдо часовым прэзыдэнтам Вэнэсуэлы і зьвярнуліся да Нікаласа Мадура з патрабаваньнем сысьці ў адстаўку, паведамляе Голас Амэрыкі.
Пры гэтым Расеі і яе саюзьнікам не ўдалося спыніць сёньняшняе пасяджэньне Рады бясьпекі. Толькі чатыры з 15 краін-удзельніц Рады бясьпекі (уключаючы нясталых членаў) прагаласавалі за спыненьне абмеркаваньня. Дзевяць дзяржаваў выказаліся за працяг паседжаньня, яшчэ дзьве — устрымаліся ад галасаваньня.
Дзяржсакратар ЗША Майк Пампэа таксама выступіў на пасяджэньні Рады бясьпекі, заявіўшы, што «прыйшоў час для ўсіх краін вызначыцца, на чыім баку яны знаходзяцца» ў вэнэсуэльскім крызісе. «Альбо вы на баку свабоды, альбо знаходзіцеся ў саюзе з Мадура...», сказаў Майк Пампэа, зьвяртаючыся да ўдзельнікаў пасяджэньня ў ААН.
Расея, як вядома, падтрымлівае рэжым Нікаласа Мадура. У Крамлі сьцьвярджаюць, што Вашынгтон спрабуе ажыцьцявіць дзяржаўны пераварот у Вэнэсуэле.
Што трэба ведаць пра крызіс у Вэнэсуэле
- 23 студзеня 2019 году на фоне канстытуцыйнага і эканамічнага крызісу ў Вэнэсуэле старшыня парлямэнту Хуан Гуайдо абвясьціў сябе часовым прэзыдэнтам і прынёс прысягу на мітынгу апазыцыі ў Каракасе. Апазыцыя не прызнала вынікаў прэзыдэнцкіх выбараў 2018 году, на якіх афіцыйна перамог дзейны прэзыдэнт Нікаляс Мадура.
Хто такі Хуан Гуайдо — новы лідэр апазыцыі Вэнэсуэлы, які абвясьціў сябе часовым прэзыдэнтам
- Гуайдо прызналі законным прэзыдэнтам амаль усе краіны Лацінскай Амэрыкі (акрамя Балівіі і Кубы), ЗША, Аўстралія, Канада і Ізраіль. 31 студзеня «адзіным і законным часовым прэзыдэнтам» Вэнэсуэлы Гуайдо прызнаў Эўрапарлямэнт. Дзейнага прэзыдэнта Нікаляса Мадура лічаць легітымным Расея, Кітай, Куба і Мэксыка.
- Беларускія ўлады заявілі, што «вэнэсуэльскі народ можа самастойна справіцца зь цяжкасьцямі, якія ўзьніклі, без ўмяшаньня звонку».
- 26 сьнежня 2019 году легітымным прэзыдэнтам краіны Гуайдо прызнаў вайсковы аташэ Вэнэсуэлы ў Вашынгтоне палкоўнік Хасэ Луіс Сілва. Ён стаў першым высокапастаўленым вайскоўцам і дыпляматам рэспублікі, якія пайшлі на такі крок. Большая частка высокапастаўленых чыноўнікаў і вайскоўцаў захавалі ляяльнасьць Мадура.
- 28 студзеня 2019 году ЗША ўвялі санкцыі супраць вэнэсуэльскай дзяржаўнай нафтавай кампаніі, каб узмацніць ціск на ўрад Мадура. Гуайдо заявіў, што бярэ кантроль над замежнымі актывамі Вэнэсуэлы, каб ня даць Мадура магчымасьці «спустошыць скарбонку».
- У адказ Вярхоўны суд Вэнэсуэлы пачаў у дачыненьні да Гуайдо расьследваньне ў сувязі з «актамі гвалту, якія адбыліся ў краіне». Яму забаранілі выезд з Вэнэсуэлы і заблякавалі доступ да банкаўскіх рахункаў.
- 29 студзеня Мадура заявіў у інтэрвію расейскім СМІ, што «гатовы сесьці за стол перамоваў з апазыцыяй». Аднак перамовы паміж ўрадам Вэнэсуэлы і апазыцыяй пачаліся толькі ў жніўні 2021 году, у Мэксыцы.
- Эканамічны крызіс у Вэнэсуэле цягнецца з 2013 году, калі да ўлады прыйшоў Мадура. Па эканоміцы краіны моцна ўдарыла падзеньне цэнаў на нафту, але ўлады вінавацяць у праблемах ЗША. За першы прэзыдэнцкі тэрмін Мадура інфляцыя склала больш як 2 000 000 000% (перад дэнамінацыяй цэны вымяраліся ў мільёнах), валавы ўнутраны прадукт зьменшыўся на 45%, з краіны эмігравала 10% насельніцтва — каля 3 млн чалавек. Сярэдняя вага вэнэсуэльца праз праблемы з харчаваньнем зьменшылася на 11 кг.
- Вэнэсуэльцы рэгулярна выходзілі на акцыі пратэсту, у якіх бралі ўдзел дзясяткі тысячаў, а часам і сотні тысячаў чалавек. Праходзілі ня толькі палітычныя пратэсты, але і галодныя бунты. У сутыкненьнях гінулі людзі, самым крывавым стаў 2017 год, калі былі зафіксаваныя сьмерці 164 чалавек.
- У 2016 годзе парлямэнт запусьціў працэдуру імпічмэнту Мадура, але імпічмэнт заблякаваў Вярхоўны суд, які пазьней фармальна пазбавіў улады Нацыянальную асамблею. У 2017 годзе Мадура склікаў Канстытуцыйную асамблею як замену парлямэнту, але яе не прызнала вэнэсуэльская апазыцыя і большасьць краінаў сьвету.
- У 2018 годзе Мадура афіцыйна перамог на датэрміновых прэзыдэнцкіх выбарах, інаўгурацыя на другі 6-гадовы тэрмін прайшла 10 студзеня. Вынікі не прызнала апазыцыя, якая байкатавала выбары і абвясьціла «маральную перамогу». Таксама вынікі выбараў не прызналі ЗША, Канада, Аўстралія і шэраг краінаў Лацінскай Амэрыкі.
