Мітрапаліт Гальскі Эмануіл (Адамакіс) пацьвердзіў у інтэрвію L'Agenzia Società per l’Informazione Religiosa, што рашэньне аб наданьні аўтакефаліі Ўкраінскай праваслаўнай царкве прынятае Канстантынопальскім патрыярхам Варфаламеем.
Як сьцьвярджае мітрапаліт Гальскі Эмануіл (Адамакіс), Канстантынопальскі патрыярх Варфаламей прыняў рашэньне, «памятаючы пра сваю адказнасьць як мацярынскай царквы і ў адказ на просьбы ўкраінскага народу, пасьля глыбокага аналізу гэтага пытаньня».
Ён дадае, што працэс наданьня аўтакефаліі ня мусіць быць прычынай падзелу ці расколу Праваслаўнай царквы, а прызначэньне двух экзархаў ва Ўкраіну з боку Ўсяленскага патрыярхату павінна «падкрэсьліць рашучасьць Варфаламея пасьпяхова разьвязаць нязгоды між украінскімі праваслаўнымі». Аўтакефалія УПЦ мае зблізіць розныя галіны ўкраінскага праваслаўя, кажа мітрапаліт Гальскі.
Раней былі толькі неафіцыйныя паведамленьні пра тое, што на сустрэчы патрыярха Канстантынопальскага і патрыярха Маскоўскага і ўсяе Русі Кірыла першы паведаміў другому пра рашэньне ўтварыць ва Ўкраіне аўтакефальную царкву. РПЦ назвала дзеяньні Канстантынопальскага патрыярхату ва Ўкраіне «подлымі і вераломнымі».
У красавіку прэзыдэнт Украіны Пятро Парашэнка зьвяртаўся да Варфаламея з просьбай выдаць томас аб аўтакефаліі царквы ва Ўкраіне і абвясьціў аб намеры стварыць «адзіную памесную царкву». Вярхоўная Рада зварот прэзыдэнта падтрымала.
Аўтакефальная праваслаўная царква ў сучасным разуменьні — гэта памесная праваслаўная царква з замацаванай за ёй кананічнай тэрыторыяй, на якой не павінны дзейнічаць іншыя памесныя царквы. Гэты статус прадугледжвае яе адміністрацыйную незалежнасьць ад іншых памесных цэркваў.
