Расейскі мільярдэр Раман Абрамовіч стаў новым рэпатрыянтам у Ізраілі: ён прыбыў у аэрапорт Бэн-Гурыёна на прыватным самалёце і там жа атрымаў усе неабходныя дакумэнты.
Каля 13:00 у панядзелак, 28 траўня, Абрамовіч прыбыў у ізраільскі аэрапорт Бэн-Гурыёна на прыватным самалёце і атрымаў пасьведчаньне новага рэпатрыянта ды ўнутраны пашпарт грамадзяніна Ізраілю, які служыць пасьведчаньнем асобы.
Пра гэта паведамляе расейскамоўнае выданьне «Вести Израиля». Інфармацыю пацьвердзіў адзін з чыноўнікаў, які афармляў дакумэнты мільярдэру.
Паводле суразмоўцы выданьня, самалёт Абрамовіча прыбыў да першага тэрміналу міжнароднага аэрапорту. Мільярдэр прайшоў у тэрмінал на агульных падставах проста да памяшканьня, дзе афармляюць прыбылых рэпатрыянтаў. Пасьля атрыманьня дакумэнтаў новы рэпатрыянт адкрыў рахунак у банку і аформіў мэдычную страхоўку.
З улікам працэдураў, якія прайшоў Абрамовіч, ён атрымаў грамадзянства Ізраілю паводле так званага «Закону аб вяртаньні». Паводле гэтага закону кожны габрэй мае права рэпатрыявацца у Ізраіль, і гэтае права распаўсюджваецца таксама на мужа і жонку, дзяцей і ўнукаў габрэяў, усе яны лічацца грамадзянамі з моманту прыбыцьця ў Ізраіль без праходжаньня кваліфікацыйнага пэрыяду.
Ізраільскія мэдыя паведамляюць, што пакуль незразумела, ці атрымаў Абрамовіч адразу і міжнародны пашпарт, які дазваляе грамадзянам Ізраілю ўяжджаць бязь візаў у краіны Эўразьвязу, у тым лік ў Брытанію, у Канаду, Расею ды іншыя краіны.
Аб магчымай рэпатрыяцыі Абрамовіча ізраільскія СМІ паведамлялі яшчэ на мінулым тыдні. Крыніцы зьвязвалі гэта з тым, што ў мільярдэра, які ў апошнія гады жыве у Лёндане і валодае футбольным клюбам «Чэлсі», паўсталі складанасьці з прадаўжэньнем брытанскай візы.
Брытанскія ўлады папрасілі яго патлумачыць паходжаньне капіталу, які ён інвэстуе ў краіну.
Паводле часопісу Forbes, у Ізраілі ў Абрамовіча ёсьць сур’ёзныя бізнэс-інтарэсы, ён займаецца інвэстыцыямі праз свае кампаніі Millhouse і Ervington.
Forbes ацэньвае актывы Абрамовіча на $11,5 млрд. Ён былы ўладальнік нафтавай кампаніі «Сибнефть», якую ў 2005 годзе прадаў «Газпрому» за $13,1 млрд. Яму належаць долі ў вытворчасьці сталі «Евраз» і кампаніі «Норильский никель», а таксама футбольны клюб «Чэлсі» зь Лёндану, набыты ім у 2003 годзе.
Бацькі Рамана Абрамовіча — Аркадзь (Арон) Нахімавіч Абрамовіч і Ірына Васільеўна Міхайленка. Дзед і бабуля алігарха па бацькоўскай лініі жылі ў Беларусі, а потым пераехалі ў Літву, адкуль пры савецкай уладзе былі высланыя ў Комі. Бабуля Рамана Абрамовіча па матчынай лініі Фаіна Барысаўна Грутман таксама мае габрэйскія карані.
