У Расеі ў сёмы раз праходзяць выбары прэзыдэнта. Кіраўнік дзяржавы абіраецца на шэсьць гадоў. Яўка можа быць любой.
У выбарах удзельнічаюць восем кандыдатаў:
- Сяргей Бабурын (партыя «Расейскі агульнанародны саюз»),
- Павел Грудзінін (Камуністычная партыя Расейскай Фэдэрацыі),
- Уладзімір Жырыноўскі (Лібэральна-дэмакратычная партыя Расеі),
- Уладзімір Пуцін (самавылучэньне),
- Ксенія Сабчак («Грамадзянская ініцыятыва»),
- Максім Сурайкін («Камуністы Расеі»),
- Барыс Цітоў (Партыя росту),
- Рыгор Яўлінскі (Партыя «Яблоко»).
За першыя чатыры гадзіны на Камчатцы прагаласавалі больш за 30% выбарцаў, на Чукотцы — больш за 47%. У дзесяці сёлах Камчаткі і Чукоткі яўка склала 100%, паведамляе Інтэрфакс.
У Южна-Сахалінску на момант адкрыцьця ўчастку № 295 у скрыні ўжо ляжалі бюлетэні. Пра гэта паведамілі ў твітэры мясцовыя назіральнікі.
У Цэнтравыбаркаме заявілі, што гэта прагаласавалі чальцы камісіі, назіральнікі і паліцыянты.
У Беларусі грамадзяне Расеі могуць прагаласаваць на ўчастках у Менску, Берасьці, Горадні, Віцебску, Гомелі, Магілёве, Бабруйску, Астраўцы, Барысаве, Баранавічах, Воршы, Полацку і ў пасёлку Азярэчча Клецкага раёну, дзе месьціцца расейская вайсковая частка.
