Прэм’ер-міністар Беларусі Андрэй Кабякоў на пасяджэньні прэзыдыюму Савету міністраў паведаміў, што ўзровень намінальнага заробку пакуль застаецца ніжэйшы, чым прадугледжана плянам-графікам па выхаду да канца году на тысячу рублёў.
За жнівень сярэдні заробак склаў 844 рублі 40 капеек (згодна з графікам павінна было быць 896 рублёў). Найбольшае адставаньне зафіксавана па Віцебскай вобласьці — на 115 рублёў.
Рэальны заробак у Беларусі за 8 месяцаў перавысіў узровень аналягічнага пэрыяду мінулага году на 3,2%. Гэта адпавядае росту прадукцыйнасьці працы па ВУП (103,2%). Амаль дасягнуты ўзровень мінулага году па росьце рэальных наяўных грашовых даходаў насельніцтва (99,9% за 8 месяцаў 2017 году).
Рэальныя даходы беларусаў амаль перасталі падаць. Якія яны цяпер?
Паводле Кабякова, кіраўніку Беларусі ўнесена прапанова павысіць пэнсіі па ўзросьце.
Таксама прэм’ер-міністар сказаў, што ўрад бліжэйшым часам разгледзіць прапановы па заробку для некаторых катэгорый бюджэтнікаў.
«Асноўныя рашэньні па заработнай плаце ў дзяржсэктары прынятыя. Павялічана стаўка першага тарыфнага разраду бюджэтнікам, вырасьлі зарплаты ў дзяржслужачых, вайскоўцаў. Па нізкааплатных катэгорыях работнікаў бюджэтнай сфэры — дадаткова разгледзім у бліжэйшы час», — сказаў прэмʼер-міністар.
Рэальныя наяўныя грашовыя даходы беларусаў па-ранейшаму зьніжаюцца. У студзені-жніўні гэты паказчык скараціўся на 0,1% да аналягічнага пэрыяду 2016 году, паведаміў Белстат.
Паводле Белстату, рэальныя наяўныя грашовыя даходы — гэта даходы за вылікам падаткаў, збораў і ўзносаў, скарэктаваныя на індэкс спажывецкіх цэнаў на тавары і паслугі. Пры гэтым, паводле Белстату, сярэдні заробак сёлета вырас з 720 да 844 рублёў.
Кіраўнік Беларусі Аляксандар Лукашэнка 17 кастрычніка падпісаў указ аб павышэньні пэнсій, паведамляе прэзыдэнцкая прэс-служба. Паводле дакумэнту, пэнсіі павялічацца з 1 лістапада ў сярэднім на 5%.
