У Беларусі істотна абмежавалі паляваньне на дзікоў, паведаміў міністар лясной гаспадаркі Беларусі Міхаіл Амельяновіч.
«Раней у Беларусь прыяжджала шмат расейскіх паляўнічых на дзіка. Яны куплялі ліцэнзіі, палявалі і такім чынам нядрэнна падтрымлівалі эканоміку нашых лясгасаў. Аднак праз пэўны час мы заўважылі, што дзікоў засталося ўжо няшмат. Таму сёлета акцэнт у паляваньні зьмяніўся. Мы прапануем іншаземцам паляваньне на ласёў, аленяў і казуляў».
Міністар адзначыў, што з увядзеньнем бязьвізавага ўезду ў Беларусь для іншаземцаў на 5 дзён да нас пацягнуліся паляўнічыя з заходніх краінаў.
«Сэзон афіцыйна адкрыўся 1 верасьня, а мы ўжо ведаем, што цяпер у нашых лясах палююць 25 іншаземцаў, якія скарысталіся новай магчымасьцю ўезду ў Беларусь».
Паводле міністра, у беларускіх лясах налічваецца больш за 9 тысяч ласёў, 6,5 тысячы аленяў і 22 тысячы казуляў.
За апошнія тры гады ў Беларусі вынішчана амаль 100 тысяч дзікоў. Рашэньне аб масавым вынішчэньні дзікоў было прынятае ў 2013 годзе, калі ў Гарадзенскай і Віцебскай абласьцях зьявілася афрыканская чума сьвіней. На пачатак кампаніі вынішчэньня ў 2013-м іх налічвалася 82,9 тысячы — зьнішчана амаль 97%.
Дзікі лічацца асноўнымі пераносчыкамі АЧС.
Афрыканская чума сьвіней — віруснае захворваньне, ад якога няма вакцыны. У хворай сьвіньні павышаецца тэмпэратура цела да 40–42 градусаў, яна кашляе, ногі паралізуе. Цягам 2 дзён сьвіньня памірае. Людзям афрыканская чума сьвіней не пагражае.
