«Мы замкнулі памяшканьне знутры»
Калі здарыўся тэракт, Вольга Порах знаходзілася на працы. З акна яна бачыла, як людзі беглі і крычалі, спрабуючы схавацца ў кавярнях і крамах.
«Гэта быў абсалютна звычайны дзень, не было ніякіх паведамленьняў пра магчымую небясьпеку. Я даведалася пра тэракт, гледзячы ў акно, бо працую ў студыі, якая знаходзіцца побач зь месцам трагедыі. Калі ўсё адбылося, людзі пачалі бегчы і крычаць. У офісе сказалі, што нешта здарылася. Мы пачалі адразу шукаць інфармацыю ў сеціве і празь некалькі хвілін даведаліся пра тэракт. Адразу на вуліцы здарыўся хаос. Мы знутры замкнулі памяшканьне, дзе працуем, і праз акно назіралі. Відовішча моцна ўражвала.
Шмат хто схаваўся ў суседніх барах і крамах. Іх адразу пачалі замыкаць, бо было незразумела, што ўвогуле адбываецца, пастаянна паступала шмат інфармацыі, нехта казаў, што дзесьці страляюць, што дзесьці можа быць выбухоўка. Ніхто не разумеў, што адбываецца і што рабіць», — расказала Вольга.
«У мяне начавалі людзі, якія не змаглі трапіць дадому»
Праз тое, што паліцыя перакрыла вуліцы, шмат супрацоўнікаў цэнтру засталіся начаваць у знаёмых.
Тэракт у Барсэлёне. Першыя фота
«Шмат хто ня змог вярнуцца дадому. Тыя, хто жыве ў прыгарадзе, не маглі паехаць ні на грамадзкім транспарце, ні на ўласных аўта, таму што вуліцы былі перакрытыя. У выніку людзі заставаліся начаваць у сяброў. І да мяне — я жыву недалёка ад цэнтру — прыйшлі некалькі чалавек. Таму раніцай 18 жніўня многія толькі вяртаюцца дадому. Цяпер людзі працягваюць абзвоньваць сваякоў і сяброў.
Я жыву ў спакойным раёне, але нават тут людзей на вуліцы асабліва няма. І выходзіць ніхто не сьпяшаецца. Але сёньня шмат хто ў любым разе будзе вяртацца дахаты, бо не начаваў дома».
«Людзям сказалі не ісьці на працу 18 жніўня»
Як і пасьля тэрактаў у іншых эўрапейскіх гарадах, на наступны дзень шмат якія працадаўцы сказалі сваім супрацоўнікам не выходзіць на працу.
«Нам патэлефанавалі з працы і сказалі, каб не прыходзілі сёньня. Таму што ноч была неспакойная, адбываліся затрыманьні, адбыўся яшчэ адзін тэракт у Камбрыльсе. Абстаноўка нестабільная. А з улікам таго, што шмат хто не начаваў дома, то працадаўцы вырашаюць папярэдзіць людзей, каб тыя не выходзілі на працу.
Зараз цяжка сказаць, усе ў стане шоку. Ніхто не разумее, як гэта ўвогуле магчыма. Таму што тэракт — гэта тое, чаго ты чакаеш менш за ўсё. І нават калі тэракты адбываліся ў іншых гарадах Эўропы, тут у Барсэлёне людзі думалі, што зь імі гэтага ніколі не адбудзецца. Таму цяпер незразумела, як гэты тэракт паўплывае на турыстычны бізнэс».
Увечары 17 жніўня ў цэнтры Барсэлёны мікрааўтобус заехаў у натоўп людзей у турыстычным квартале Рамбла.
У выніку тэракту загінулі 13 чалавек, больш за 100 атрымалі раненьні. Беларусаў сярод пацярпелых няма.
Двое з тых, хто нападаў, былі затрыманыя паліцыяй, трэцяга забілі ў перастрэлцы. «Ісламская дзяржава» заявіла пра сваю адказнасьць за напад.
