У Гомлі 26 сакавіка не было масавага збору пратэстоўцаў, але асобныя купкі людзей сабраліся на плошчы Паўстаньня. Там, як і напярэдадні, гарадзкія ўлады зладзілі кірмаш.
Мясцовыя жыхары бачылі апранутых у цывільнае міліцэйскіх начальнікаў з Цэнтральнага РАУС, з эканамічных падразьдзелаў міліцыі.
Ад плошчы Паўстаньня людзі ішлі да плошчы Леніна. Некалькі груп людзей былі заўважаны каля драматычнага тэатру і прыпынку грамадзкага транспарту.
Міліцыя затрымала карэспандэнтку БелаПАН Алену Германовіч і дзьвюх жанчын, якія за яе заступіліся. Іх адвезьлі для разбору ў Цэнтральны РАУС.
«Ніхто не зьбіраўся 26 сакавіка ладзіць у горадзе акцыю. Быў Дзень Волі — нагода ўсім зразумелая. Нейкае непаразуменьне паходзіла ад сталічных палітычных структураў — ладзіць масавыя акцыі сёньня. Думаю, такая дэзарыентацыя — ад няўменьня дамаўляцца пра агульныя дзеяньні», — лічыць намесьнік старшыні абласной арганізацыі АГП Мікалай Новікаў.
Напярэдадні ў Гомлі пасьля «Маршу недармаедаў — 2» былі схопленыя і адпраўленыя ў ізалятар Аляксандар Процка, Натальля Шчукіна, Ала Раманчык, некалькі моладзевых актывістаў. Яшчэ да акцыі затрымалі і адвезьлі ў ізалятар намесьніка старшыні АГП Васіля Палякова. У вёсцы Цярэшкавічы Гомельскага раёну затрымалі рэгіянальнага прадстаўніка Беларускага незалежнага прафсаюзу РЭП Віктара Казлова, а ў Гомлі — актывіста гэтага ж прафсаюзу Аляксандара Еўсейчука.
У Рэчыцы сёньня міліцыя забрала з працоўнага месца на рынку лідэра мясцовых прадпрымальнікаў, прадстаўніка кампаніі «Гавары праўду» Алега Шабетніка.
«Апытваюць, каго ведаю, а каго — не. Нейкія незразумелыя прэтэнзіі», — кажа Шабетнік.
Паводле прадпрымальніка, міліцыя затрымала таксама рэчычанку Іну Манянкову і журналіста-фрылансэра Андрэя Мядзьведзева. Сябра Партыі БНФ Валер Пуціцкі ў дом міліцыю не пускае.
