Праца замежнага прадпрыемства «Кранаспан» станавілася нагодай для скліканьня сходаў. На грамадзкіх слуханьнях людзі вінавацілі чыноўнікаў і прадстаўнікоў гэтага прадпрыемства ў нядбаньні пра будучыя пакаленьні. Наракалі на смурод з заводзкага коміна і зьліваньне нечыстот на палі.
Пасялкоўцаў запэўнівалі, што «Кранаспан» працуе паводле найноўшых тэхналёгіяў і навакольнаму асяродзьдзю ня шкодзіць. Даводзілі, што новыя вытворчасьці — гэта працоўныя месцы і папаўненьне бюджэту.
Тое, што Лукашэнка падчас наведваньня «Кранаспану» не згадаў пра экалягічную небясьпеку ад такіх вытворчасьцяў, пасялкоўцаў абурае.
«Гаварылі пра ўсё, але пра экалёгію згадкі не было, і кіраўнік дзяржавы таксама на гэтую тэму не пытаў. У афіцыйных паведамленьняў, прынамсі, пытаньняў пра навакольнае асяродзьдзе не было», — адзначыў адзін з абаронцаў навакольля Вейна.
«Такім чынам, можна казаць, што наша паветра чысьцейшым ня стане пасьля наведваньня Лукашэнкам „Кранаспану“, — выказаўся суразмоўца. — Прэзыдэнт казаў пра неабходнасьць стварэньня вялікіх і маленькіх прадпрыемстваў, гэта значыць даў зразумець, што яму патрэбныя грошы. А пытаньне экалёгіі для яго другаснае. Каб я быў на такой сустрэчы, дык пытаньне пра навакольнае асяродзьдзе задаў бы».
Паводле жыхароў Вейна, нягледзячы на запэўніваньні адміністрацыі «Кранаспану», што вытворчасьць экалягічна бясьпечная, усё роўна паветра з пахам, асабліва калі вецер дзьме на пасёлкі. Сустрэцца з кіраўніком дзяржавы і пагутарыць пра экалёгію пажадала б нямала пасялкоўцаў, але іх не запрасілі.
Пра тое, што пад бокам хімічная вытворчасьць, людзям нагадвае комін, які няспынна дыміць. У пасёлках кажуць, што падчас паводкі вада ў мясцовай рачулцы, якая ўпадае ў возера, была зь пенаю. «Нібы з пральнай машыны. Дык гэта што, чыстая вада?», — казалі яны.
Выклікаюць занепакоенасьць у пасялкоўцаў і намеры ўзьвесьці яшчэ адну вытворчасьць непадалёк ад іх месца жыхарства. Яны пратэстуюць супраць прадпрыемства для вырабу тэхнічнага вугляроду з расейскім капіталам «Омск Карбон Магілёў». Пад зваротам супраць будаўніцтва падпісаліся 3 тысячы жыхароў Вейна і Навасёлак. Расейскае прадпрыемства побач з «Кранаспанам».
Паводле жыхароў Вейна, у іх пад бокам на тэрыторыі Свабоднай эканамічнай зоны № 4, якую наведаў Лукашэнка, узьведзеныя ці ўзводзяцца больш як дваццаць хімічных вытворчасьцяў. «Кожная зь іх нясе патэнцыйную небясьпеку навакольлю і здароўю», — настойваюць людзі.
Перад візытам Лукашэнкі ўздоўж гомельскай шашы і ля «Кранаспану» ды «Омск Карбона Магілёва» актыўна высаджвалі лесапаласу, якая, паводле задумы, мае засьцерагчы навакольныя землі ад шкодных выкідаў.
