«Пятай калёны тут няма», — Лукашэнка на «Вялікай размове з прэзыдэнтам». Анлайн

Лябедзька: «Хай называе хоць пятай, хоць дваццатай калёнай»

Лідэр АГП Анатоль Лябедзька не запрошаны на сустрэчу з Аляксандрам Лукашэнкам, але ён ня лічыць сябе пятай калёнай: «Не мая місія здагадвацца, каго Лукашэнка лічыць пятай калёнай. Пакуль у краіне няма свабодных выбараў і палітычнай канкурэнцыі, хай называе нас хоць пятай, хоць дваццатай калёнай. Прыйдзе час, калі людзі самі будуць выказваць нам давер альбо не выказваць».

«Я супраць таго, каб у школе была рэлігія»

Лукашэнка выказаўся супраць таго, каб перагружаць дзяцей у школе. Ён прывёў у прыклад школьную праграму, зь якой сутыкаецца ягоны малодшы сын Мікалай:

«Гляджу нядаўна, чытае, як малітву. Ці то Біблію, ці то Тору, ці то Каран. Гляджу: літаратура. Што гэта? Адкуль зьявілася? Пацанёнку 12 гадоў — што вы ў гэтай кніжцы напісалі?»

«Я супраць таго, каб у школе была рэлігія. У нас сьвецкая адукацыя», — падкрэсьліў прэзыдэнт.

«А колькі ў нас у школе таго, што ня трэба? У нас школа перагрузіла дзяцей настолькі, што ім дыхаць немагчыма.... І ведаеце — дэбілы. Мы да 17-18 гадоў дзяцей заганяем так, што яны пачынаюць пакутаваць на дэбілізм... Я сам гэта прайшоў!», — заявіў Лукашэнка.

Віталь Цыганкоў

Уступнае слова доўжылася гадзіну

Калі фактычна толькі ўступнае слова Лукашэнкі расьцягнулася на гадзіну — можна ўявіць, колькі будзе ўся «размова». Паказальна, аднак, што пакуль кіраўнік дзяржавы амаль нічога не казаў пра замежную палітыку і дачыненьні з Расеяй.

Навучыце дзяцей працаваць сякерай, а не кампутарам

Навучыце дзяцей жыць, кажа Лукашэнка. Гэта значыць, навучыце дзяцей карыстацца малатком, сякерай і інш. Пра кампутар гаворка не ідзе. То бок, кіраўнік дзяржавы жыве ў іншай эпосе. Гэта адлюстраваньне патрыярхальнай, даіндустрыяльнай эпохі. Лукашэнка і сьвет жывуць у розных гістарычных пэрыядах, што адбіваецца на ўсёй дзяржаўнай палітыцы.

Іосуб: «Адкуль 500 даляраў, калі няма росту ВУП?»

Эканаміст Вадзім Іосуб камэнтуе Свабодзе тэзісы Аляксандра Лукашэнкі пра сярэдні заробак 500 даляраў:

«Колькі б кіраўнік краіны не казаў пра заробак 500 даляраў любой цаной, важным момантам застаецца менавіта тое, якой цаной гэта будзе дасягнута. З ростам прыбыткаў мы сутыкаліся і раней, але праз эмісію, праз друкаваньне грошай, а не праз рост вытворчасьці. Такі шлях непазьбежна прыводзіў да інфляцыі, дэвальвацыі. Да канца году росту вытворчасьці ў параўнаньні зь сёньняшнімі паказчыкамі не прагназуецца».