«Пятай калёны тут няма», — Лукашэнка на «Вялікай размове з прэзыдэнтам». Анлайн

«Я ня маю права адмяніць сьмяротнае пакараньне»

Дэпутатка Палаты прадстаўнікоў Алена Анісім пацікавіліся, ці гатовы Лукашэнка падтрымаць мараторый на сьмяротнае пакараньне ў Беларусі.

Лукашэнка заявіў, што ён не крыважэрны, але зрабіць гэтага ня можа, бо людзі падтрымалі сьмяротнае пакараньне на рэфэрэндуме.

«Я ня маю права адмяніць сьмяротнае пакараньне або ўвесьці мараторый. У нас прайшоў рэфэрэндум», — падкрэсьліў ён.

«Тыя, хто гэта ўвялі, яны цяпер гатовыя адмяніць мараторый, але ня ведаюць, як гэта зрабіць», — заявіў ён.

Хто ў Палаце гаспадар?

Кажучы пра Марзалюка, Лукашэнка прызнаў, што менавіта ён (прэзыдэнт) вызначаў, каго прызначаць старшынямі камісій у Палаце прадстаўнікоў. Цікавае прызнаньне. А мы думалі наіўна, што Палата прадстаўнікоў — самастойны і незалежны орган.

«Я супраць таго, каб фарсілі беларускай мовай»

Дэпутатка Палаты прадстаўнікоў Алена Анісім спытала Лукашэнку наконт пэрспэктыў стварэньне нацыянальнага ўнівэрсытэта з беларускай мовай навучаньня.

«Я не магу сказаць не. І не магу сказаць так. Калі гэта будзе нармальна ўспрынята, калі будуць жадаючыя атрымліваць адукацыю на беларускай мове...Я б вас яшчэ рэктарам зрабіў. Але галоўная, каб гэта было запатрабавана. Трэба прапрацаваць гэтае пытаньне. Гэта нават было б ня кепска. Але я супраць таго, каб фарсілі беларускай мовай: вось я размаўляю па-беларуску, таму я больш беларус. Але я заклінаю вас, не адмаўляйцеся ад расейскай мовы», — заявіў ён.

Без майго ведама чыноўнікі льготных крэдытаў не бяруць

Галоўны рэдактар «Народнай волі» Ёсіф Сярэдзіч задаў пытаньне наконт 3-адсоткавых крэдытаў для суседзяў Лукашэнкі па Драздах.

«Я ня ведаю, ці мог банк выдаць такі крэдыт. Але думаю, ніводзін чыноўнік без майго ведама не пайшоў бы браць такі крэдыт, бо назаўтра Шуневіч ці Вакульчык павеў бы за вушы самі ведаеце куды», — заявіў ён.

Лукашэнка паабяцаў праверыць інфармацыю Сярэдзіча.

«Я ня памятаю, каб я такое рашэньне прыняў. Але я б мог прыняць такое рашэньне. Чыноўнікі не сабакі і ня сволачы. Ёсьць сапраўды адарваныя, адмарожаныя, прадзяржаўныя людзі, якія цану маюць ня меншую, чым той вясковец, якому мы давалі пад 1%», — заявіў ён.

Паротнікаў: вучэньні сапраўды не прывядуць да акупацыі Беларусі

Кіраўнік аналітычнага праекту Belarus Security Blog Андрэй Паротнікаў згодны з Лукашэнкам: «Любыя размовы пра магчымую акупацыю Беларусі падчас вучэньняў „Захад-2017“ — гэта правакацыя і блюзьнерства».

«Я цалкам згодны з пазыцыяй Лукашэнкі наконт таго, што гэтыя вучэньні не ўяўляюць небясьпекі для Беларусі. Сюды будуць перакінутыя 2 мотастралковыя брыгады, а гэта ня шмат. Яны будуць разьмеркаваныя па 10 палігонах, і калі яны паспрабуюць учыніць любую правакацыю, то гэта будзе апошняе, што яны зробяць у сваім жыцьці, і апошнія міжнародныя вучэньні, у якіх паўдзельнічае Расея».

«Выдумаць нацыянальную ідэю немагчыма»

Лукашэнка заявіў, што цяпер нацыянальнай ідэі ў беларусаў няма і ён ня лічыць, што яе трэба выдумляць.

«Я абсалютна перакананы — выдумаць нацыянальную ідэю немагчыма. Да гэтага павінна падвесьці само жыцьцё. Занадта мала мы пражылі як цалкам сувэрэнная і незалежная дзяржава. Нават Расея цяпер гэтага ня можа зрабіць».