«Пятай калёны тут няма», — Лукашэнка на «Вялікай размове з прэзыдэнтам». Анлайн

Лукашэнка назваў Шушкевіча шулерам

Лукашэнка выказаў думку, што цяперашняе абвастрэньне стасункаў з Расеяй зьвязанае з насьцярожанасьцю Масквы наконт таго, што Беларусь сыдзе на Захад. Праз гэта ў тым ліку пачалі ў Расеі крытыкаваць Уладзімера Макея.

Лукашэнка таксама заявіў, што не Беларусь была ініцыятаркай развалу СССР, а Расея. Ён прыгадаў: «Убег Шушкевіч (а я ўгаворваю не развальваць краіну), кажа: усе ўжо прынялі дэклярацыю аб незалежнасьці, трэба і нам. І прагаласавалі. А тады яшчэ ня ўсе прынялі, ён проста схлусіў... Шулер!»

Пра Майдан і годнасьць украінцаў

Лукашэнка заявіў пра ўкраінскую Рэвалюцыю годнасьці: «Ад Майдану і рэвалюцыі кепска не Януковічу і не Лукашэнку, а вам, гэта будзе ганьба для народу. Майдан — гэта кляймо на ўкраінскім народзе».

Палітоляг Аляксандар Фядута такім чынам пракмэнтаваў гэтае выказваньне Лукашэнкі: «Лукашэнка сказаў глупства. Майдан быў цяжкім выпрабаваньнем, крызісам, празь які ўкраінцы прайшлі, ня страціўшы ўласнай годнасьці».

«Нафта несупастаўная зь незалежнасьцю»

Тэлеканал «Мір» задаў пытаньне Лукашэнку пра беларуска-расейскія стасункі.

«Я баюся сказаць нешта лішняе. Зь іншага боку, сытуацыя дайшла да таго, што я ўжо мала чаго маю права ўтойваць. Я павінен пра гэта шчыра сказаць. У апошні час сытуацыя разьвіваецца так сабе. У Расеі розных сілаў — мора. Пуцін кажа: не зьвяртай увагу. У нас настолькі гэты спэктар розны. На жаль, яны розныя і ў кіраўніцтве краіны. І што вельмі дрэнна — некаторыя рэчы разыходзяцца з думкай і рашэньнем самога прэзыдэнта. Гэта ўжо нікуды не падыходзіць», — заявіў ён.

Цяперашняе абвастрэньне ня першае. Лукашэнка нагадаў:

«Расея часта хапалася за газавую трубу, нафтавую. Гэта адбываецца і сёньня. Хоць пасьля ўсякіх такіх канфліктаў мне казалі, што „мы пагарачыліся“. Але навошта хапацца за жывое? Навошта хапаць нас за горла?»

Лукашэнка падкрэсьліў, што Беларусь можа абысьціся без расейскай нафты:

«Нафта несупастаўная з незалежнасьцю. Мы ўсё роўна знойдзем выйсьце — гэтага ў Расеі, на жаль, не разумеюць. Думаюць, што мы нікуды не падзенемся».

Да дыскусіі паміж Раманчуком і Лукашэнкам

У 2011 годзе доля прадукцыі, вырабленай на прадпрыемствах, якія належаць дзяржаве або кантраляванымі дзяржавай, склала 70% ВУП Беларусі. У той жа час, гэты паказчык у суседніх краінах — Польшчы, Літве, Латвіі, Расеі і Ўкраіне — вагаўся ад 40 % ва Ўкраіне да 25% у Літве і Польшчы. Акрамя таго, сярод 29 краінаў ранейшага сацыялістычнага блёку, уключаючы і краіны Цэнтральнай Эўропы, Каўказу і Сярэдняй Азіі доля дзяржаўнай уласнасьці ў Беларусі была самай высокай, выключэньнем стала толькі адна краіна — Туркмэністан.

У Кітаі ў 1978 годзе доля дзяржаўнай уласнасьці ў ВУП складала 78%, у 2008 годзе — 28%.

Лукашэнка лічыць, што ня трэба нічога мяняць

Вельмі шмат часу Лукашэнка траціць на абгрунтаваньне таго, што рынкавыя рэформы ў эканоміцы не патрэбны. Аргумэнты розныя: ня трэба сьпяшацца; трэба думаць пра людзей, якія працуюць на дзяржпрадпрыемствах; прыватнік ня больш эфэктыўны, чым дзяржпрадпрыемства; бізнэсоўцы жульнічаюць (Мураўёў). Але сутнасьць адна: ня трэба нічога асабліва мяняць, няхай ўсё будзе, як ёсьць.

«Справядлівасьць» альбо закон?

З вуснаў кіраўніка дзяржавы прагучалі дзьве важныя канцэптуальныя заявы.

Першая. «Мяне ўжо не пераробіш. Я лічу, што мадэль для нас і для славянскіх краінаў — гэта сацыяльна арыентаваная эканоміка».

Другая. «Я справядлівасьць стаўлю вышэй за любы закон».

Гэта азначае дзьве рэчы. Па-першае, Лукашэнка прызнае, што, пакуль ён прэзыдэнт, ня будзе ў Беларусі лібэральнай рынкавай эканомікі («капіталістычнай»), будзе «сацыяльная арыентаваная» (па сутнасьці, «сацыялістычная»). Па-другое, калі Лукашэнка «справядлівасьць» ставіць вышэй за закон, гэта азначае адсутнасьць прававой дзяржавы, прыярытэту закону. Гэта азначае, што кіраўнік дзяржавы лічыць магчымым «па справядлівасьці» ўмешвацца ў справы судовай сыстэмы.

Лукашэнка запрасіў Раманчука ў раду разьвіцьця прадпрымальніцтва

Лукашэнка распарадзіўся ўключыць Яраслава Раманчука ў савет па разьвіцьці прадпрымальніцтва, калі ў яго ёсьць такое жаданьне. «Я не перакананы, што прадпрымальнікам сёньня проста немагчыма жыць. Але раз вы кажаце, значыць, у гэтым нешта ёсьць», — адзначыў ён.

Раманчук у сваю чаргу запрасіў Лукашэнку выступіць на Асамблеі дзелавых колаў.