«Пятай калёны тут няма», — Лукашэнка на «Вялікай размове з прэзыдэнтам». Анлайн

Лукашэнка пакуль не называе Расею, нават калі відавочна намякае на яе: «Я патлумачыў МВФ, што будзе з нашымі прадпрыемствамі, калі іх прыватызаваць». «Калі я выстаўлю прадпрыемствы на продаж — кожны з вас адкажа, хто іх купіць». Відавочны намёк на расейскіх алігархаў. Хоць слова «Расея» Лукашэнка сёньня пакуль яшчэ ані разу не прамовіў.

Раманчук і Лукашэнка размаўляюць на розных мовах

Раманчук кажа пра скарачэньне функцый дзяржавы. Лукашэнка гаворыць пра «аптымізацыю», то бок скарачэньне дзяржапарату, скарачэньне колькасьці чыноўнікаў. Але скарачэньне чыноўнікаў без скарачэньня функцый нічога не мяняе. Раманчук кажа пра неэфэктыўнасьць дзяржсэктару. А Лукашэнка кажа, што калі пачнём прыватызацыю, то невядома, дзе гэтыя дзяржпрадпрыемствы апынуцца, мо ў замежнікаў. Пра эфэктыўнасьць гаворка не ідзе.

Пра бунт чыноўнікаў

Эканаміст Яраслаў Раманчук задаў пытаньне пра надзвычай высокія дзяржаўных выдаткі і раздзьмуты дзяржсэктар.

Аляксандар Лукашэнка адзначыў, што разумее, пра што кажа эканаміст, але аптымізацыю дзяржаўных функцый і дзяржаўнага апарату трэба праводзіць акуратна.

«Я вырас у вёсцы, я вясковы хлопец. Гэта вясковае пачуцьцё ў мяне. Трэба акуратна, асьцярожна. Гэта ж лёсы людзей, мы ідзём па тонкім лёдзе». Паводле яго, супраціву дзяржапарату пры гэтым ён не адчувае і бунту сярод чыноўнікаў ня сьпее. «Калі я ў гэтым перакананы, то я ўсё роўна гэтага дабʼюся».

Юры Дракахруст

«500 даляраў — кроў з носу сёлета»

«Зарплаты і пэнсіі могуць быць павышаныя толькі пры эфэктыўнай рабоце эканомікі». Вынікі працы эканомікі: Зьніжэньне ВУП у 2015 годзе — 3.9%, зьніжэньне ў 2016 годзе — 2.6%. Занятасьць у 2016 годзе зьнізілася на 2%. Вытворнасьць працы = ВУП/занятасьць. За кошт якой «эфэктыўнай работы эканомікі» могуць быць павышаныя заробкі да 500 даляраў?

Дармаедаў усяго некалькі тысяч, а не 400 тысяч?

Лукашэнка кажа, што дармаеды, якія абураюцца дэкрэтам, — гэта вельмі невялікая частка (каля некалькіх тысяч чалавек), але надта актыўная. Але гэта не адпавядае рэчаіснасьці. Бо, паводле афіцыйных заяў чыноўнікаў, дармаедаў, ад якіх дзяржава хоча атрымаць гэты падатак, — каля 400 тысяч чалавек.

Іосуб: «Адкуль 500 даляраў, калі няма росту ВУП?»

Эканаміст Вадзім Іосуб камэнтуе Свабодзе тэзісы Аляксандра Лукашэнкі пра сярэдні заробак 500 даляраў:

«Колькі б кіраўнік краіны не казаў пра заробак 500 даляраў любой цаной, важным момантам застаецца менавіта тое, якой цаной гэта будзе дасягнута. З ростам прыбыткаў мы сутыкаліся і раней, але праз эмісію, праз друкаваньне грошай, а не праз рост вытворчасьці. Такі шлях непазьбежна прыводзіў да інфляцыі, дэвальвацыі. Да канца году росту вытворчасьці ў параўнаньні зь сёньняшнімі паказчыкамі не прагназуецца».

Навучыце дзяцей працаваць сякерай, а не кампутарам

Навучыце дзяцей жыць, кажа Лукашэнка. Гэта значыць, навучыце дзяцей карыстацца малатком, сякерай і інш. Пра кампутар гаворка не ідзе. То бок, кіраўнік дзяржавы жыве ў іншай эпосе. Гэта адлюстраваньне патрыярхальнай, даіндустрыяльнай эпохі. Лукашэнка і сьвет жывуць у розных гістарычных пэрыядах, што адбіваецца на ўсёй дзяржаўнай палітыцы.

Віталь Цыганкоў

Уступнае слова доўжылася гадзіну

Калі фактычна толькі ўступнае слова Лукашэнкі расьцягнулася на гадзіну — можна ўявіць, колькі будзе ўся «размова». Паказальна, аднак, што пакуль кіраўнік дзяржавы амаль нічога не казаў пра замежную палітыку і дачыненьні з Расеяй.