«Пятай калёны тут няма», — Лукашэнка на «Вялікай размове з прэзыдэнтам». Анлайн

«Пазычаць можна, але ўжо нельга»

«Зарплаты і пэнсіі будуць павышаныя, калі ў рэальным сэктары эканомікі вырабім больш і якасна, і прадамо па больш высокай цане. Ёсьць іншы шлях, можна ў кагосьці пазычыць, адабраць, але гэта ня наш шлях. У нас і так запазычанасьць значная, а грошы трэба вяртаць. Таму зарплаты і пэнсіі могуць быць павышаныя толькі пры эфэктыўнай рабоце эканомікі», — кажа Лукашэнка.

Ён адзначыў, што гэтыя словы не супярэчаць заявам аб неабходнасьці дасягнуць узроўню сярэдніх заробкаў 500 даляраў.

Людзі пытаюцца пра пэнсіі і заробкі

У відэароліку, падрыхтаваным прэсавай службай Аляксандра Лукашэнкі, людзі з розных гарадоў у яго пытаюцца:

«Калi падвысяць пэнcii i заробкi? Калi спыняць будоўлю палацаў i пачнуць будаваць шпiталi? Калi адменяць дэкрэт пра дармаедзтва? Як падняць эканомiку, як выйсьцi з усяго гэтага?».

Чаму 500 даляраў?

500 даляраў сярэдні заробак — гэта тое, што дзяржава павінна дапамагчы чалавеку, каб ён мог больш-менш жыць. 1000, 2000 даляраў не забаронена. Мы жывём у рынкавай эканоміцы, падабаецца яна каму ці не. Мне — не.

Валер Карбалевіч

Дыялёг з самім сабою

Супярэчнасьць закладзеная ў самым пачатку. Лукашэнка кажа, што цяпер без дыялёгу нікуды, што тут прадстаўленае шырокае кола беларускай грамадзкасьці. Аднак у зале бачу ў асноўным чынавенства, работнікаў дзяржаўных структураў, прыдворных палітолягаў. Незалежнае грамадзтва прадстаўленае вельмі слаба. Апазыцыя не прадстаўленая ўвогуле, бо, паводле Лукашэнка, яна «пятая калёна». Тады з кім дыялёг? З самім сабой?

«Паглядзіце, што робіцца на Данбасе»

Лукашэнка адзначыў, што некаторыя скептычна ставяцца да ягоных слоў аб прыярытэце бясьпекі і міру ў краіне. «Тых, хто так кажа, я адпраўляю на Данбас. Няхай паглядзяць, што там робіцца», — заявіў ён.

«Пятай калёны тут няма»

«Без дыялёгу сёньня нікуды. Заўтра тым больш», — з гэтых слоў пачаў сустрэчу Аляксандар Лукашэнка.

Ён адзначыў, што на сустрэчы сабраліся ня толькі журналісты, але і прадстаўнікі грамадзкасьці. Лукашэнка заклікаў абмяркоўваць абсалютна ўсё і выказваць свае думкі. «Мы сабраліся не для піяру. А калі гэта і піяр, то ён павінен быць успрыняты нашым народам», — заявіў ён.

Паводле Лукашэнкі, на сустрэчу былі запрошаны ня ўсе: «Пятай калёны тут няма. Тут ёсьць людзі, што апазыцыйна думаюць, якія не галасавалі за прэзыдэнта, але яны любяць сваю краіну і зь імі я гатовы гутарыць».