Нацыянальны гістарычны музэй заступіўся за свой філіял пры Адміністрацыі і патрабуе выбачэньняў ад журналіста ОНТ, які раскрытыкаваў экспазыцыю.
Адміністрацыя Нацыянальнага гістарычнага музэю ў адкрытым лісьце пагражае судом аглядальніку ОНТ Аляксею Міхальчанку, калі не атрымае ад яго публічных выбачэньняў за крытычныя выказваньні пра Музэй сучаснай беларускай дзяржаўнасьці, што ў будынку адміністрацыі Аляксандра Лукашэнкі. Гэты музэй — філіял Нацыянальнага гістарычнага музэю.
14 студзеня ў аўтарскім відэаблогу «Як ёсьць» Аляксей Міхальчанка выказаў асабістыя заўвагі адносна экспазыцыі, якая, як можна зразумець зь відэаблогу, ня ўразіла яго і ягоных замежных сяброў падчас нядаўняга наведваньня.
Гэтак, на думку аглядальніка ОНТ, копію дэклярацыі аб дзяржаўнай незалежнасьці Беларусі варта было б паказваць значна маштабней, як і копію беларускага спадарожніка, які, дарэчы, так і не даляцеў да арбіты Зямлі. Яшчэ журналіст прапаноўваў разьмясьціць у музэі сапраўднае кола кар’ернага велікагруза «Белаз», каб стварыць для наведнікаў удалую «фатазону», ды раіў дэманстраваць наведнікам вялікія зьліткі золата, каб паказаць наяўнасьць у краіне рэальных золатавалютных рэзэрваў. Бадай што самым сьмелым крокам па прывабліваньні наведнікаў, паводле Аляксея Міхальчанкі, было б усталяваньне ў музэі васковых фігур вядомых спартоўцаў, у тым ліку знакамітай біятляністкі Дар’і Домрачавай і кіраўніка краіны, вядомага аматара хакею Аляксандра Лукашэнкі — «калі тыя ня будуць супраць».
Але ўсе гэтыя прапановы журналіста ня толькі не спадабаліся супрацоўнікам музэю, але і выклікалі ў іх абурэньне. Частку прапановаў журналіста адміністрацыя Нацыянальнага гістарычнага музэю назвала ў лісьце «абсурднымі», іншыя — «некарэктнымі» альбо несумяшчальнымі з клясычным характарам Музэю сучаснай беларускай дзяржаўнасьці, роля якога, на думку аўтараў ліста, — «адукоўваць, а не забаўляць».
«У выпадку адмовы Аляксея Міхальчанкі даць публічныя выбачэньні Нацыянальны гістарычны музэй пакідае за сабой права зьвярнуцца ў суд для абароны гонару, годнасьці і дзелавой рэпутацыі музэю паводле арт.153 Грамадзянскага кодэксу», — цытуе БелаПАН ліст Нацыянальнага гістарычнага музэю.
