Супрацоўнікі камітэту дзяржкантролю Беларусі перакрылі канал паставак з Расеі вадкасьці з мэтылавым сьпіртам, паведаміў тэлеканал «Беларусь-1».
Аўтацягнік зь небясьпечнай вадкасьцю быў затрыманы ў Гомельскай вобласьці, машына ехала ў напрамку Полацка мясцовымі дарогамі, аб'язджаючы цэнтральныя трасы.
У машыне знайшлі 5600 каністраў з 28 тысяч літрамі вадкасьці, у якой утрыманьне мэтанолу перавышала дапушчальнае ў 500 раз. Праваахоўнікі кажуць, гэта такі самы мэтанол, які ўтрымліваўся ў «Глогу», якім масава атруціліся ў Расеі ў мінулым годзе.
Вадкасьць магла трапіць у продаж. Супраць затрыманых, якія аказаліся жыхарамі Віцебскай вобласьці, распачалі справу за незаконную прадпрымальніцкую дзейнасьць. Сьцьвярджаецца, што затрыманыя — «кіраваная ўстойлівая злачынная групоўка».
Сама па сабе настойка глогу не нясе сьмяротнай небясьпекі. Але ў расейскім Іркуцку адбылося масавае атручэньне касмэтычным сродкам, названым «Глог», у якім замест этылавага сьпірту быў сьмяротна небясьпечны мэтылавы. На пачатак студзеня паведамлялася, што ад атручэньня загінулі 78 чалавек. Было затрымана 19 падазраваных, чацьвёра арыштаваныя.
У Беларусі пасьля расейскай трагедыі ўводзілі часовае абмежаваньне на продаж настоек глогу, кіпцікаў (календулы), валяр’яны, сардэчніку, мурашынага сьпірту. Лукашэнка выказаўся пра масавае атручваньне «Глогам» у Расеі: маўляў, у Беларусі ня варта падымаць акцызы на алькаголь.
