Міністар замежных справаў Польшчы Вітальд Вашчыкоўскі пацьвердзіў намер скараціць датацыі «Белсату». У сваім «Твітэры» ён напісаў:
«Польскі ўрад ня ёсьць уладальнікам „Белсату“. Мы абмяжоўваем датацыі каналу з прычыны павелічэньня консульскіх выдаткаў».
У пазьнейшых твітах палітык патлумачыў, што МЗС мае намер адкрыць за мяжой новыя польскія консульствы і патроіць дапамогу для сырыйскіх уцекачоў на Блізкім Усходзе.
«„Белсат“ мае магчымасьць рэфармавацца, мае магчымасьць шукаць новых спонсараў», — напісаў міністар Вашчыкоўскі.
Тэлеканал «Белсат» ёсьць часткаю польскай грамадзкай тэлевізіі TVP. Скарачэньне датацыяў МЗС, на думку дырэктаркі каналу Агнешкі Рамашэўскай, азначае фактычнае закрыцьцё «Белсату», паколькі TVP не ў стане самастойна фінансаваць спадарожнікавы тэлеканал для Беларусі.
Паводле крыніцы польскай газэты Dziennik, старшыня праўленьня TVP Яцэк Курскі «не жадае ўвайсьці ў гісторыю як далакоп каналу».
«Ён лябіюе на карысьць „Белсату“, але разумее, што рашэньне з боку МЗС прымае само ведамства, — цытуе ананімную крыніцу выданьне Dziennik».
