Старшыня рады прадпрымальнікаў рынку «Паўднёвы» Андрэй Шасьцяракоў, які ўваходзіць у склад працоўнай групы на перамовах з прадстаўнікамі ўлады ў Менску, распавёў аб тым, як праходзяць перамовы.
Паводле Шасьцяракова, ніякіх канкрэтных вынікаў дасягнуць пакуль не ўдалося, практычна ўсе прапановы працоўнай групы, у тым ліку і аб прыпыненьні дзеяньня указу № 222 альбо ўнясеньні ў яго зьменаў з тым, каб ІП па ўсёй Беларусі маглі працаваць надалей, прадстаўнікамі ўрада не прымаюцца.
Шасьцяракоў: Гэты перамоўны працэс можа зацягнуцца, паколькі патрабуецца мноства зьменаў у заканадаўстве, мы прапаноўвалі, каб людзі гэтым часам працавалі, але нам адказвалі — не і ўсё. А вы паглядзіце, што ў многіх нашых прадпрымальнікаў ужо заканчваюцца грошы, а ў кожнага сям’я і дзеці. І няма грошай на хлеб, а я ўжо не кажу пра тое, што ніхто не адмяняў аплаты арэнды і падаткаў. Наагул, усё выглядае даволі пэсымістычна, і пэрспэктыва пакуль ніякая не праглядваецца. У аўторак сустрэча працоўнай групы працягнецца.
Адна з прадпрымальніц заўважыла, што за гэты час маскоўскія аптавікі зьмянілі стаўленьне да беларускіх прадпрымальнікаў і па-сутнасьці адмаўляюцца прадаваць тавар.
Прадпрымальніца: Я была ў Люберцах, дзе вялікая аптовая база. Хацела набыць тавар, а мне адказваюць, што беларусы могуць набыць у іх тавар толькі такім чынам, як набываюць шынку ў краме, маўляў, вось вам чэк і больш мы з вамі ніякай справы мець ня хочам. Гэта ўсё таму, што яны ня могуць прадставіць нам тых дакумэнтаў, якія мы патрабуем.
Падчас сустрэчы прадпрымальнікаў ніякіх рашэньняў не прымалася. Журналісты цікавіліся, ці нехта зьбіраецца зь іх ехаць у Менск пратэставаць, але такая прапанова зацікаўленасьці не выклікала.
На сходзе прадпрымальнікаў прысутнічала каля ста чалавек. Паводле інфармацыі спадара Шэсьцяракова надалей на рынку працягваюць працаваць 229 індывідуальных прадпрымальнікаў, а ўсяго на рынку «Паўднёвы» зарэгістравана 1830 прадпрымальнікаў.
