22 студзеня ў Навуковай бібліятэцы БНТУ і Пушкінскай бібліятэцы ў межах фэстывалю мабільнага кіно velcom Smartfilm прайшла першая для горада Ноч бібліятэк.
ФОТАГАЛЕРЭЯ. «Ноч бібліятэк»: у Менску ўначы чыталі кніжкі
Вядомыя беларусы пачыталі перад публікай свае любімыя творы. Пераважна на Ночы бібліятэк з вуснаў выступоўцаў гучала беларуская мова і творы беларускіх пісьменьнікаў.
Дырэктар па маркетынгу баскетбольнага клюбу «Цмокі» Аляксандр Куль прачытаў урывак з кнігі «Шляхціч Завальня».
Заснавальнік Tut.by Юры Зісер — невялікі ўрывак з кнігі Алексіевіч «Час сэканд-хэнд».
Вядучая Ганна Бонд сказала, што дрэнна ведае мову, і прачытала некалькі вершаў Багдановіча.
Менскі рэстаратар Вадзім Пракопьеў абраў урывак з кнігі Караткевіча «Чорны замак Альшанскі» на расейскай мове.
Гэтыя чытаньні адбыліся ў бібліятэцы БНТУ.
Тым часам у «Пушкінцы» журналіст і культуроляг Максім Жбанкоў чытаў вершы Ігара Бабкова.
Сьпявак і тэлевядоўца Герман Цітоў выканаў розныя вершы пад гітарны акампанэмэнт, замілаваўшы залю «Ганарыстым парсюком» Крапівы.
Лідэр гуртоў «Кассиопея» і «Петля пристрастия» Ільля Чарапко-Самахвалаў — урыўкі «Сьлёзаў Тубі» Янкі Маўра, пасьля якіх у свій час палюбіў беларускую мову.
Паэт Андрэй Хадановіч — «некамуністычныя» вершы Янкі Маўра і ўласныя творы.
А рэдактарка Kyky.org Саша Раманава — урыўкі з кнігі Сяргея Календы.
У бібліятэцы БНТУ былі арганізаваныя майстар-клясы па традыцыйным беларускім мастацтве пляценьня павукоў і адкрыты занятак па кітайскай каліграфіі.
«Пушкінка» наладзіл курсы партугальскай і швэдзкай моваў. На абедзьвюх пляцоўках праводзіліся лекцыі аб тым, як здымаць кіно «на мабільнік» і здымках трэйлераў да кніг альбо «буктрэйлераў», ладзіліся гурткі па настолтных гульнях, у ліку якіх былі і беларускія «Паўстанцы», «Мова» ды «Разам».
Месца ў залях бібліятэкаў не заўсёды хапала ўсім ахвочым. Сумарную колькасьць наведнікаў ацаніць цяжка, але гардэробшчыца Пушкінскай бібліятэкі заявіла карэспандэнту Свабоды, што ніколі яшчэ ня бачыла ў сваёй установе столькі наведнікаў.
