Менскі гарадзкі выканаўчы камітэт рэкамэндуе рабіць рэклямныя шыльды на беларускай мове, калі яны будуць разьмяшчацца на будынках, якія лічацца гісторыка-культурнай каштоўнасьцю.
«Гэта дапаможа стварыць нацыянальны антураж. Таму мы разам з камітэтам архітэктуры і горадабудаўніцтва рэкамэндуем, каб у выпадках, калі гэта магчыма, шыльды і рэкляма былі на беларускай мове. Пра гэта нас просіць насельніцтва», — паведаміла агенцтву «Менск-Навіны»
начальніца аддзелу па кантролі за рэклямай і абароне правоў спажыўцоў упраўленьня гандлю і паслуг Менгарвыканкаму Ірына Лятняк.
Старшыня Таварыства беларускай мовы імя Францішка Скарыны Алег Трусаў кажа, што вітае і падтрымлівае ініцыятыву менскіх уладаў:
«Усё правільна. Добра. Я падтрымліваю такую прапанову. Я лічу, што да ўлады паступова прыходзіць маладзейшае пакаленьне, якое больш прыхільна ставіцца да беларускага. Савецкія людзі альбо памерлі, альбо на пэнсіі. Таму гэта аб’ектыўны працэс».
Алег Трусаў дадаў, што няма нічога страшнага ў пазыцыянаваньні беларускай мовы як «антуража». На яго думку, гарадзкія ўлады разумеюць, што выкарыстаньне беларускай мовы — гэта адметнасьць, якую ня трэба хаваць:
«Гэта добра. Хай лепш беларуская мова будзе сувэнірам і антуражам, чым „калгаснай мовай, ад якой трэба пазбаўляцца“. Гэта значыць, што беларуская мова становіцца брэндам, модным, папулярным».
