На суд над Рубцовым прыехала шмат актывістаў апазыцыі, журналістаў, прыехалі таксама жонка Рубцова Ядзьвіга і сын Віктар.
Судзіць актывіста судзьдзя Мікалай Рэпіха.
Самога падсуднага прывезьлі за паўгадзіны да пачатку працэсу, міліцыянты завялі яго з тыльнага боку будынка суду. Сьведкі кажуць, што падсудны ледзьве ішоў — спадар Рубцоў працягвае галадоўку пратэсту, якую ён пачаў 8 красавіка на знак пратэсту супраць незаконнага перасьледу.
Суд пачаўся
Рубцоў сязіць ў жалезнай клетцы за шклом бяз майкі, у яго тату на грудзях «Лукашэнка сыходзь».
Судзьдзя патрабуе, каб Рубцоў апрануўся
Рубцоў адмаўляецца і згадвае, як яго судзіў судзьдзя Полулех, але яго «дагэтуль не прыцягнулі да адказнасьці». Таму на знак пратэсту ён «наўмысна распрануўся».
Судзьдзя пагражае
Судзьдзя пагражае Рубцову, што выдаліць яго з залы суду, калі ён не апранецца. «Калі ласка, выдаляйце», — адказаў Юры Рубцоў. Судзьдзя пачаў зачытваць правы абвінавачанага.
Зачытваюць абвінавачваньне
Пакуль судзьдзя ня выдаліў Рубцова. Пракурор пачала зачытваць абвінаваўчае заключэньне. Паводле гэтага абвінавачаньня, Рубцоў 4 разы адмовіўся ад прапанаванай яму працы, ў тым ліку кіроўцам ў Акцыянэрным таварыстве «Агро» і «Ліноўскае». Рубцоў на гэта кажа, што вінаватым сябе не прызнае. Пакуль даваць паказаньні ён адмаўляецца, кажа, што дасьць паказаньні пасьля апытаньня сьведак. Рубцоў выглядае вельмі схуднелым, але гаворыць гучна, энергічна. У судовай зале актывісты апранулі майкі з надпісамі «Лукашэнка, сыходзь».
Суд пачаў апытваць сьведак
Першым выступае сьведка падпалкоўнік Макаеў, начальнік спэцкамэндатуры ў вёсцы Куплін Пружанскага раёну. Паводле сьведкі, ужо 5 студзеня Рубцову прапаноўвалі два працоўныя месцы кіроўцам, але ён адмовіўся. Заробак на тых працах быў каля 5 мільёнаў рублёў, а сярэдні па Пружанскім раёне заробак быў каля 4,5 мільёнаў рублёў. Потым Рубцову прапанавалі працу ў гаспадарцы «Ліноўскае», але той адмовіўся зноў. За парушэньні яму абвяшчалі спагнаньні. Рубцова афіцыйна папярэджвалі аб магчымасьці прыцягнуць яго да крымінальнай адказнасьці.
Сьведка заявіў, што Рубцову не давалі пісьмовага загаду ісьці на працу
У сакавіку Рубцова зноў накіроўвалі на працу, але ён адмаўляўся, і тады матэрыялы на яго былі накіраваныя для завядзеньня крымінальнай справы. Сьведка паведаміў суду, што Рубцоў працягваў казаць, што ён асуджаны незаконна. Рубцова ахарактарызаваў як «запальчывага» чалавека, які ствараў канфлікты з супрацоўнікамі спэцкамэндатуры. Рубцоў пытаецца сьведку, чаму яму не загадвалі ісьці працаваць, а замест гэтага яму толькі прапаноўвалі. Сьведка сказаў, што пісьмовага загаду ён сапраўды не даваў, але загадваў вусна, а іншага «не прадугледжана».
Рубцоў апэлюе да 47 артыкулу Крымінальна-выканаўчага кодэксу, паводле якога, як ён лічыць, ён ня меў права працаваць паводле працоўнай дамовы, бо быў асуджаны. Між тым яго прымушалі самога падпісаць працоўную дамову.
Сьведка Макаеў кажа, што ў спэцкамэндатуры Куплін ёсьць яшчэ «хімікі», якія не працуюць, але таму, што не хапае ўсім працы.
Апытваюць сьведку Бондара, намесьніка начальніка спэцкамэндатуры. Пацьвярджае, што ўжо 5 студзеня Рубцоў адмовіўся ад прапанаванай яму працы.
Дапытваюць сьведку Віктара Бондара, начальніка аддзела ў спэцкамэндатуры. Ён кажа, што Рубцоў адмаўляўся працаваць за тыя грошы, які яму прапаноўваліся. Пры гэтым ён пацьвердзіў, што верыць у тое, што сярэдні заробак па краіне — 600 даляраў, але ў Пружанскім раёне, паводле сьведкі, сярэдні заробак ніжэйшы.
Дапыталі трох сьведак, выклікалі чацьвертага
Усе дапытаныя сьведкі — міліцыянты. Аднаго сьведку судзьдзя выклікаў, але начальнік «хіміі» пра яго сказаў, што той не атрымаў позвы ў суд. Судзьдзя загадаў яго знайсьці і выклікаў новага сьведку — Касенчука, таксама міліцыянта з «хіміі».
Сьведка Касянчук кажа, што Рубцоў адмаўляўся ад прапанавай працы, бо яго не задавальняў заробак. Пасьля адмовы Рубцова папярэджвалі, што яго могуць прыцягнуць да адказнасьці. Касянчук згадаў, што заробак, які прапанавалі Рубцову, быў 4,5 мільёны рублёў.
Цікавая падрабязнасьць — пасады кіроўцаў, якія прапаноўвалі Рубцову, дагэтуль вакантныя. «Бо там была першая катэгорыя, якая ёсьць ў Рубцова, а ў іншых „хімікаў“ такой катэгорыі няма», — патлумачыў сьведка Макаеў.
Сьведка-інспэктар па працаўладкваньні распавёў, як Рубцова вазілі ў ААТ «Ліноўскае» і прапаноўвалі працу. Тады Рубцоў прайшоў папярэднюю працэдуру і мэдкамісію, але на месцы, калі даведаўся пра заробак, адмовіўся. Там заробак быў 4,5 мільёны рублёў.
На пытаньне адваката сьведка згадаў, што Рубцоў пісаў заяву ад прыёме яго на працу — гэта ён сам бачыў. Але працоўную дамову Рубцоў не падпісаў. Сьведка не патлумачыў, чаму на заяве Рубцова стаіць адна дата, а на дамове --- іншая. Сьведка кажа, што гэта ўсё адбывалася ў адзін дзень.
Сьведка: Рубцоў катэгарычна не адмаўляўся ад працы
Выступае сьведка -«хімік» Рубель. Засьведчыў, як 21 студзеня Рубцова выклікалі ў «дзяжурку», і там ён адмовіўся ад прапанаванай працы, але нічога не падпісаў. Другі раз ён прысутнічаў пры тым, як Рубцоў адмовіўся ад працы ў гаспадарцы «Ліноўскае». Рубель на пытаньне Рубцова сказаў, што яму ў ААТ «Ліноўскае» абяцалі 3 мільёны, а плацілі 2. «Але ж зь мяне вылічвалі», — дадаў ён. Сьведка пацьвердзіў, што катэгарычна Рубцоў ніколі не адмаўляўся ад працы, але «Рубцова не задавальняў заробак».
Суд над Юрыем Рубцовым — ФОТАГАЛЕРЭЯ
Суд над Юрыем Рубцовым
Выступае яшчэ адзін сьведка-«хімік» — Янчук. Ён таксама пацьвердзіў, што Рубцоў адмовіўся ад працы 5-га студзеня: «Адмовіўся з-за таго, што не задаволіў заробак». Сказаў, што ніколі ня чуў ад Рубцова, каб той казаў, што «катэгарычна адмаўляецца працаваць». Пацьвердзіў, што Рубцоў абураўся тым, што прымушаюць працаваць насуперак закону за нізкія заробкі.