Прэсавая служба прэзыдэнта паведаміла, што Парашэнка ў тэлефоннай размове 15 жніўня заявіў прэм'ер-міністру Вялікай Брытаніі Дэвіду Кэмэрану, што «значная частка абсталяваньня» была зьнішчаная ўкраінскай артылерыяй.
Раней у штабе антытэрарыстычнай апэрацыі, якая вядзецца ўкраінскай арміяй на ўсходзе краіны, пацьвердзілі, што калёна расейскіх БТРаў і вайсковых грузавікоў перасекла мяжу Ўкраіны праз захоплены сэпаратыстамі ўкраінскі прапускны пункт «Ізварын».
Праходжаньне калёны празь мяжу пацьвердзіла выведка. Паводле яе зьвестак, нумарныя і апазнавальныя знакі на тэхніцы былі расейскімі, – гаворыцца ў паведамленьні. У штабе адзначылі, што калёна нешматлікая, аднак падлічыць дакладную колькасьць бронетэхнікі і грузавікоў выведнікі ня могуць. Паводле папярэдніх зьвестак, у грузавіках былі ўзброеныя салдаты.
У памежным кіраваньні ФСБ Расеі не пацьвердзілі гэтую інфармацыю. Як заявілі ва ўправе, у зьвязку з рэгулярнымі абстрэламі расейскай тэрыторыі былі створаныя мабільныя групы з складу памежнай службы ФСБ, якія пры зваротах жыхароў з нагоды стральбы неадкладна выкарыстоўваюцца для датрыманьня бясьпекі мяжы і расейскіх грамадзянаў. Пры гэтым мабільныя групы дзейнічаюць выключна на тэрыторыі Расеі, – падкрэсьліваюць у ФСБ.
