ПАДЗЕІ ДНЯ
У Беларусі паводле рашэньня ўраду ўводзяцца новыя цэны на газ і электрычнасьць. Гэта ўжо сёмае падаражаньне электрычнасьці сёлета.
У каталікоў – Дзень усіх сьвятых. Вернікі дзякуюць Богу за дар сьвятасьці і аддаюць пашану ўсім сьвятым – як вядомым, так і невядомым, – якія дасягнулі вечнай хвалы і перабываюць з Богам у небе. У многіх каталіцкіх краінах, у тым ліку суседніх Польшчы і Літве, сёньня дзяржаўнае сьвята.
У Менску ў Палацы Рэспублікі пачнецца міжнародны кінафэстываль «Лістапад». Да яго прымеркаваная і выстава, прысьвечаная гісторыі беларускага кіно.
У сталіцы пройдзе таксама міжнародная канфэрэнцыя «Зямля – аснова ўсёй Айчыне», прысьвечаная 90-годзьдзю выхаду ў сьвет паэмы Якуба Коласа «Новая зямля».
Кніжны сайт «Bookster.By» запрашае ўсіх ахвотных у галерэю «Ў» на сустрэчу з загадкавым пісьменьнікам Максам Фраем.
ГЭТЫ ДЗЕНЬ У ГІСТОРЫІ
1911 – аэраплян упершыню ў гісторыі скінуў бомбу з паветра, у вайне італьянцаў з туркамі.
1937 – у Курапатах карнікі НКВД расстралялі 11 сьвятароў Беларускай аўтакефальнай праваслаўнай царквы.
1993 – уступіла ў сілу Маахстрыхская дамова, якая паклала пачатак Эўрапейскаму Зьвязу.
У гэты дзень нарадзіліся:
1868 – Дзьмітры Даўгяла, беларускі археограф і гісторык.
1873 – Іван Замоцін, беларускі літаратуразнавец.
1912 – Янка Золак, беларускі паэт, пэдагог, грамадзкі дзеяч, выдавец на эміграцыі ў ЗША.
1915 – Міхась Кавыль, беларускі паэт, пэдагог, грамадзкі дзеяч у замежжы.
1933 – беларускі пісьменьнік Вячаслаў Адамчык.
У гэты дзень памерлі:
1888 – Мікалай Пржавальскі, расейскі географ і вандроўнік беларускага паходжаньня.
1893 – польскі мастак Ян Матэйка.
1971 – савецкі рэжысэр і сцэнарыст Міхаіл Ром.
1972 – амэрыканскі паэт Эзра Паўнд.
1984 – беларускі мастак Пётра Сергіевіч.
ЦЫТАТА НА ПАМЯЦЬ
А дзе ж той выхад? дзе збавеньне
З няволі цяжкай, з паланеньня?
Адзін ён ёсць: зямля, зямля,
Свой пэўны кут, свая ральля:
То – наймацнейшая аснова
І жыцьця першая умова.
Зямля ня зьменіць і ня здрадзіць,
Зямля паможа і дарадзіць,
Зямля дасьць волі, дасць і сілы,
Зямля паслужыць да магілы,
Зямля дзяцей тваіх ня кіне,
Зямля – аснова ўсёй айчыне.
Якуб Колас. З паэмы «Новая зямля»
