Вінаградава вывезьлі за горад, каб сарваць сустрэчу ля Акрэсьціна
12 кастрычніка з ізалятару на Акрэсьціна вызваліўся актывіст «Эўрапейскай Беларусі» Павал Вінаградаў, асуджаны на 15 сутак адміністрацыйнага арышту за арганізацыю пратэстнай акцыі з удзелам «сьвіных галоў» на плошчы Якуба Коласа.
Каб сарваць сустрэчу Паўла Вінаградава са сваякамі і сябрамі, яго вывезьлі за горад і выпусьцілі з міліцэйскага аўтамабіля ў раёне пасёлку Сокал. Пра гэта «Свабодзе» паведаміў бацька актывіста Юры Вінаградаў.
«Едзем зараз шукаць Паўла», — сказаў Юры Вінаградаў.
Павал Вінаградаў цягам арышту трымаў галадоўку. У ізалятары актывіста
наведваў адвакат.
Пасьля 15-й гадзіны стала вядома, што сваякі знайшлі Паўла Вінаградава ля пасёлка Сокал, што за 20 км ад Менскай кальцавой дарогі.
