Працаўнікам ільнозаводу прапануюць папрацаваць у цырульнях

Цяпер пагроза звальненьня паўстала перад інжынэрна-тэхнічным пэрсаналам ды мэханізатарамі, якіх ужо папярэдзілі, што працаваць яны будуць без дадатковых да заробку выплат. Жанчынам, якія працавалі з ільном, прапануюць стаць прадавачкамі й нават знайсьці сабе занятак у цырульнях. Раней прапаноўвалі езьдзіць на працу на Шклоўскі ільнозавод.

Пра тое, што ільнозавод закрываюць, стала вядома пры канцы траўня. Супраць гэтага намеру выступілі жанчыны, якія працавалі ў цэху з ільном. 25 траўня іх не пусьцілі на працоўныя месцы. Тры дні яны прыходзілі да прахадной і чакалі, пакуль начальства перадумае. Урэшце іх адправілі ў адпачынак. Сёньня ён скончыўся, але завод так і не запрацаваў. У адміністрацыі прадпрыемства паведамілі, што цяпер адбываецца яго рэарганізацыя. Людзям прапануецца альбо працягнуць адпачынак яшчэ на месяц за свой кошт у сувязі з вытворчай неабходнасьцю, альбо звольніцца:

«Вытворчая неабходнасьць такая, што няма эканамічнага абгрунтаваньня існаваньня прадпрыемства», — зазначае супрацоўнік адміністрацыі.





Паводле суразмоўцы, доўг заводу складае 10 мільярдаў рублёў. Большая частка яго нарасла ад 2005 году з прычыны невысокай рэнтабэльнасьці. Акрамя таго, паводле супрацоўніка адміністрацыі, частку бюджэтных сродкаў, якія выдзяляліся прадпрыемству, проста скралі:

«Кіраўнік арганізацыі іх скраў, і цяпер ён у вышуку. Тры мільярды».



Пагутарыць з жанчынамі, якія вырашылі пакуль узяць адпачынак за свой кошт, але не звальняцца, не ўдалося. Сытуацыю пакуль яны не жадаюць камэнтаваць. Мужчыны-мэханізатары кажуць, што чарга звальненьня дойдзе і да іх:

«Яны во і да нас дабраліся. Расцэнкі, кажуць, парэжам, прэміяў ня будзе, кляснасьць плаціць ня будуць. Сілком звальняйцеся, сыходзьце, і ўсё. Нібыта мы на сябе не напрацоўваем. Дык гэта ж яны спынілі вытворчасьць, а ня мы. Дзеўкі ўчора заклікалі, што давайце будзем працаваць — новая траста пойдзе. Дзеўкі кажуць: што мы, тут па трыццаць гадоў адпрацавалі — і што, пойдзем цяпер на падсобныя працы?», — распавядае адзін з працаўнікоў.

Юрыст холдынгу «Магілёўабллён» пра прычыны закрыцьця Круглянскага льнозаводу казаць адмовілася, аднак заявіла:

«Там у раёне ёсьць вакантныя месцы, і людзі самі ня хочуць пераходзіць».

Звольненым з ільнозаводу прапануюць уладкавацца прадаўцамі, цырульнікамі, а таксама ў сельскай гаспадарцы — даяркамі. Адзінаму вытворчаму прадпрыемству ў райцэнтры, перасоўна-мэханізаванай калёне, патрабуюцца рознарабочыя.

Раней пісалі, што Круглянскі льнозавод мала таго, што нерэнтабэльны, але яшчэ і аварыйны. У адміністрацыі паведамілі, што дазволу на запуск заводу не дае санэпідэмстанцыя, Міністэрства надзвычайных сытуацыяў. Каб ліквідаваць аварыйнасьць цэху, неабходныя велізарныя ўкладаньні.



А як ставяцца жыхары райцэнтру да закрыцьця льнозаводу? Некалькі меркаваньняў:

Спадарыні: «Супраць. Людзям дзе працаваць тады? Акрамя гандлю, няма дзе. Прадаўцы патрабуюцца. Больш нідзе няма як зачапіцца».

Спадарыня: «Адмоўна, вядома ж. Гэта ўсё ж мінус раёну. Аб’ёмы вытворчасьці скарачаюцца. Раёну горш. Працоўных месцаў у нас мала».

Спадарыня: «Непажадана, вядома. Адно прадпрыемства было, і тое закрылі. Так і раён ліквідуюць».

На Круглянскім ільнозаводзе ў тым, што яго зьбіраюцца зачыніць, вінавацяць Шклоўскі льнозавод, якому нібыта нестае сыравіннай базы. Нястачу зьбіраюцца папоўніць ільном з Круглянскага раёну. Тут сёлета ім засеялі тысячы гектараў. Працаўнікі кажуць, што лён урадзіў, і калі ня будзе непагадзі, то сыравіна для льнозаводаў будзе высокай якасьці. Раней працаўнікам з Круглянскага льнозаводу прапаноўвалі езьдзіць у Шклоў на працу, аднак яны адмовіліся. Доўг, які набраўся ў прадпрыемства, яны гатовыя сплаціць, абы ўратаваць прадпрыемства ад закрыцьця. Пакуль жа працаўніцы праз суд дамагаюцца, каб ім выплацілі заробак за красавік і травень ды адпускныя.