Абмеркаваньне справаздачы Харасьці

Міклаш Харасьці ў заключнай прамове зазначыў, што толькі сёньня ён змог уступіць у дыялёг са спадаром Хвастовым.

Харасьці адказаў на крытыку на адрас сваёй справаздачы, настойваў на аб’ектыўнасьці і неперадузятасьці сваіх высноваў, патлумачыў, чаму парушэньні правоў чалавека ў Беларусі не толькі сыстэматычныя, але і сыстэмныя — паколькі яны зьяўляюцца вытворным ад існуючага ладу кіраваньня ў краіне. Спадар Харасьці назваў вельмі важным, каб працэс выкананьня рэкамэндацыяў быў двухбаковы, каб Менск не ўхіляўся ад супрацоўніцтва, паколькі ён ужо 10 гадоў адмаўляецца ад супрацы з камітэтам ААН па правах чалавека.

Як пазытыўныя навіны спадар Харасьці ацаніў паведамленьні аб сустрэчах міністра замежных спраў Беларусі Макея і ягонай намесьніцы Купчыной з прадстаўнікамі Эўразьвязу, іх заявы аб гатоўнасьці да супрацоўніцтва.

Спадар Харасьці заявіў, што ён гатовы далей працягваць мандат дакладчыка ААН па правах чалавека ў Беларусі, і рабіць гэта аб’ектыўна і неперадузята.


Рашэньне аб працягу мандата спадара Харасьці можа быць ухваленае 6 чэрвеня.

У заключнай рэмарцы прадстаўнік афіцыйнага Менску Міхаіл Хвастоў выказаў падзяку тым краінам, якія выступалі за дыялёг па правам чалавека, і нагадаў краінам Эўразьвязу пра масавыя народныя пратэсты ў іх краінах і выказаў гатоўнасьць Менска да дыялёгу па праблемам гэтых краінаў.

«Што датычыць Бяляцкага, ён асуджаны за няўплату падаткаў, ягоныя даходы пацьверджаныя ўрадамі Польшчы і Літвы», — заявіў Хвастоў.

Прадстаўніца Freedom House заявіла: «У Беларусі не было свабодных выбараў з 1994 года».

Намесьнік старшыні праваабарончага цэнтру «Вясна» Валянцін Стэфановіч вітаў справаздачу Харасьці і заявіў:

• сытуацыя ў краіне застаецца стабільна кепскай
• у турмах працягваюць знаходзіцца палітвязьні,
• выносяцца сьмяротныя прысуды
• Беларусь ігнаруе рашэньні камітэту па правах чалавека ААН , не выконвае яго рашэньне па асобных скаргах.

Стэфановіч заклікаў ўлады Беларусі вярнуцца да супрацоўніцтва са структурамі ААН і дапусьціць дакладчыка ў краіну.

Выступаюць прадстаўнікі міжнародных праваабарончых арганізацыяў, якія падтрымліваюць высновы спадара Харасьці і заклікаюць Менск вызваліць палітвязьняў, у тым ліку праваабаронцу Алеся Бяляцкага, увесьці пасаду амбудсмэна, спыніць практыку парушэньне правоў чалавека, скасаваць сьмяротнае пакараньне.

Сірыя назвала справаздачу «незбалянсаванай», абвінаваціла Харасьці, што ён адлюстроўвае толькі меркаваньне заходніх краінаў ды заклікала спыніць цкаваньне ўладаў Беларусі.

Прадстаўнік Ірану назваў справаздачу Харасьці «палітычна матываванай».

Прадстаўніца Палестыны заявіла пра палітызацыю і падвойныя стандарты у справаздачы Харасьці.

Бэльгія заявіла пра сыстэмны і сыстэматычны характар парушэньня правоў чалавека ў Беларусі і заклікала да безумоўнага вызваленьня ўсіх палітычных вязьняў і іх рэабілітацыі, мараторыю на сьмяротнае пакараньне.

Прадстаўнік Узбэкістану назваў справаздачу неаб’ектыўнай і ацаніў як непрымальны заклік аб вызваленьні палітычных вязьняў, без вывучэньня сутнасьці матэрыялаў іхных крымінальных справаў.

Нарвэгія назвала справаздачу вельмі карыснай і заклікала Менск выконваць яе рэкамэндацыі, у тым ліку — тэрмінова скасаваць сьмяротнае пакараньне, вызваліць палітвязьняў. Нарвэгія выказалася таксама за працяг мандату Харасьці.

Літва шкадуе, што Беларусь адмовілася ад супрацоўніцтва з дакладчыкам, выказала поўную падтрымку заключэньня справаздачы Харасьці, заявіла пра сыстэмнае і сыстэматычнае парушэньне правоў чалавека ў Беларусі.

Віетнам: толькі дыялёг і паразуменьне з двух бакоў можа прывесьці да станоўчага выніку.

Прадстаўнік Швэцыі выказаўся за працяг мандату спадара Харасьці.

Прадстаўнік Славакіі заявіў пра ўціск у Беларусі апазыцыі, адвакатаў, журналістаў, заклікаў вызваліць палітвязьняў і выказаў шкадаваньне, што спадару Харасьці не дазволілі прыехаць у краіну.

Прадстаўніца Чарнагорыі адзначыла пазытыўныя крокі беларускіх уладаў у зьніжэньні сьмяротнасьці немаўлятаў, але заявіла пра існаваньне ў Беларусі палітычна матываваныя арыштаў, абмежаваньні свабоды слова і іншыя парушэньні правоў чалавека.

Прадстаўніца М’янмы заклікала да дыялёгу Рады па правах чалавека і Беларусі.

Прадстаўнік Лібану заявіў аб «пазытыўных зьявах» у выкананьні правоў чалавека ў Беларусі і залікаў улады краіны працягваць гэтыя крокі.

Прадстаўнік Вялікай Брытаніі таксама заклікаў Менск выконваць рэкамэндацыі спадара Харасьці, вызваліць палітвязьняў і ўвесьці мараторый на сьмяротнае пакараньне.

Швайцарыя выказала асаблівае шкадаваньне ў сувязі з новымі фактамі выкананьня сьмяротных прысудаў у Беларусі і заклікала беларускія ўлады неадкладна накласьці мараторый на выключную меру пакараньня. Прадстаўнік гэтай краіны таксама заклікаў вызваліць палітвязьняў Бяляцкага, Статкевіча, Дашкевіча і іншых, а таксама заклікаў Менск выконваць рэкамэндацыі Харасьці і даць магчымасьць яму наведаць краіну.