Ад гэтага панядзелка ўсе супрацоўнікі катэдры журналістыкі недзяржаўнага Інстытуту сучасных ведаў апынуліся бяз працы. Загадвала катэдрай Людміла Асінская, працавалі там таксама прафэсары Ігар Асінскі й Эдуард Мельнікаў. Апошні ёсьць віцэ-прэзыдэнтам Беларускай асацыяцыі журналістаў, а муж і жонка Асінскія ўзначальвалі раней газэту “Белоруссия”, якую стварылі пасьля звальненьня з рэдакцыі “Советской Белоруссии”.
Паводле спадара Мельнікава, яшчэ летась у сьнежні Аляксандар Лукашэнка, наведваючы будынак тэлеканалаў АНТ і СТБ, даў даручэньне праверыць сыстэму недзяржаўнай журналісцкай адукацыі, а менавіта суадносіны яе з усімі дзяржаўнымі адукацыйнымі стандартамі. Пасьля гэтага катэдра журналістыкі Інстытуту сучасных ведаў прайшла дзьве праверкі — прэзыдэнцкай камісіі ды Міністэрства адукацыі. Вынікі гэтых праверак, як зазначыў Эдуард Мельнікаў, былі станоўчыя, хаця адпаведныя даведкі пісалі канкурэнты — прадстаўнікі факультэту журналістыкі Беларускага дзяржаўнага ўнівэрсытэту.
(Мельнікаў: ) “Літаральна на мінулым тыдні прарэктар Інстытуту сучасных ведаў Надзея Шырокава паведаміла катэдры, што набор журналістаў на будучы навучальны год адмяняецца. Мы пайшлі да рэктара Шырокава Аляксандра Міхайлавіча, і той загадаў, што набор таік павінен быць. Але празь літаральна некалькі дзён мы даведаліся, што загадчык катэдры, прафэсар Асінскі, прафэсар Мельнікаў звольненыя”.
Эдуард Мельнікаў дадаў, што супрацоўнікам катэдры далі зразумець: яе існаваньне наўпрост зьвязалі з падаўжэньнем ліцэнзіі, якую мае Інстытут сучасных ведаў. Паводле меркаваньня віцэ-прэзыдэнта Беларускай асацыяцыі журналістаў, ліквідацыя катэдры — гэта падзея з таго ж рэчышча, што й закрыцьцё незалежных газэтаў і дэпартацыя зь Беларусі карэспандэнта НТВ.
(Мельнікаў: ) “Зачыстка такая ідзе ня толькі па мас-мэдыя, але й па недзяржаўных установах, якія рыхтуюць журналістаў. Недзяржаўныя журналісты нікому не патрэбныя і нават трэба, каб іх не было”.