БХД аднаўляе збор подпісаў за вяртаньне касьцёла Сьвятога Язэпа

БХД настойвае на вяртаньні кляштара і касьцёла Сьвятога Язэпа пасьля таго, як галоўны інжынэр КУП “Менская спадчына” Міхаіл Жых заявіў, што ў кляштары разьмесьцяць гатэль.

БХД хоча ініцыяваць агульнабеларускую кампанію за вяртаньне касьцёла Сьвятога Язэпа.

Як паведамляе прэсавая служба БХД, адзін зь лідэраў партыі Віталь Рымашэўскі заявіў з гэтай нагоды:

"Беларускія ўлады чарговы раз выявілі ў гэтым сваю антыхрысьціянскую сутнасьць. Калі з былога кляштара зробяць гатэль, гэта будзе помнікам бездухоўнасьці сёньняшняй улады. Лукашэнка толькі да пэўнага часу ішоў на “загульваньне” з цэрквамі, каб выглядаць “веруючым” чалавекам. Пытаньне з вяртаньнем касьцёла Сьвятога Язэпа – адзін са шматлікіх прыкладаў стаўленьня беларускіх уладаў да хрысьціянскіх канфэсій.

Я зьвяртаюся да палітычных і грамадзкіх лідэраў з заклікам выступіць за вяртаньне кляштара яго законным гаспадарам”.