Прэм’ер-міністр Расеі Ўладзімер Пуцін з афіцыйным візытам наведаў Беларусь і правёў перамовы з Аляксандрам Лукашэнкам. Камэнтары слухачоў:
Спадарыня: “Людзі добрыя, што гэта будзе, калі на нашай тэрыторыі Пуцін хоча рабіць нейкую ваенную групоўку?! Хто ж з суседзяў мяркуе нападаць на нас? Я думаю, што ніхто, і мы таксама на нікога”.
Спадар, Менск: “Пуцін і Лукашэнка — гэта адна хеўра”.
Аляксандар Лукашэнка ўхваліў вынікі выбараў дэпутатаў Палаты прадстаўнікоў і назваў іх гістарычнымі. На гэтую ж тэму і выказваньні слухачоў:
Спадарыня: “Лукашэнка падзякаваў Ярмошынай. Хай ня радуюцца, яшчэ будуць плакаць. Колькі вяровачцы ні віцца, а канец будзе”.
Анастас Семяновіч: “Так фальсыфікаваць умоўныя выбары Эўропе і Амэрыцы яшчэ трэба павучыцца”.
Спадарыня: “Выбары прайшлі дэмакратычна. Сьмех дый годзе! Як можна не паважаць сваіх людзей? Як можна ігнараваць правы чалавека, каб так пэрыядычна праводзіліся выбары?! Сорам! Яшчэ які сорам — так ставіцца да нашых людзей!”
У працяг тэмы — пытаньне, дасланае ў СМС-лісьце. “Шаноўная Свабода! Нядаўна прайшлі парлямэнцкія выбары. Наступныя, прэзыдэнцкія, адбудуцца ў 2011-м годзе. Цікава, а чым займаецца ЦВК i асабіста Лідзія Ярмошына ў пэрыяд паміж выбарамі? Няўжо адпачываюць?”
На пытаньне адказвае старшыня Цэнтральнай выбарчай камісіі Мікалай Лазавік:
“Самая галоўная нашая праца ў пэрыяд паміж выбарамі — гэта падрыхтоўка да чарговай выбарчай кампаніі. Акрамя таго, у ЦВК на ўзгадненьне прыходзіць шэраг законапраектаў, якія мы таксама разглядаем. Ну і, натуральна, нашая праца — гэта ўсё ж такі канцэнтрацыя ўсіх нашых высілкаў на чарговай выбарчай кампаніі”.
Спадар: “Хацеў бы, каб Радыё Свабода сказала пра псыхіятрычныя клінікі, куды рэжым адпраўляе нязгодных зь ім людзей, і якія там умовы”.
Выказваньне камэнтуе палітык і праваабаронца Ўладзімер Лабковіч:
“Нельга казаць, што ў нас у масавым парадку выкарыстоўваецца рэпрэсіўная псыхіятрыя для палітычнага перасьледу апанэнтаў сёньняшняй улады. Але ж такія сымптомы і кепскія выпадкі ёсьць. Гэта выпадак з Крысьцінай Шацікавай і іншыя. Ёсьць такія прыклады, але пакуль яны маюць адзінкавы характар, і спадзяюся, што Міністэрства аховы здароўя не дазволіць уцягнуць сябе ў такую кепскую і брудную справу. А што да пытаньня ўтрыманьня ў гэтых месцах, то, на жаль, у нас як праваабаронцаў ёсьць падставы меркаваць, што гэтыя ўмовы значна горшыя, чым у беларускіх турмах”.
Далей выказваньні на розныя тэмы:
Сяргей Патаранскі: “Калі мы не зьберажэм сёньня творцу, калі мы ня будзем дбаць пра іх лёс, то ня будзе нацыі”.
Спадар: “Я абураны стаўленьнем улады да дробных прадпрымальнікаў. Такое ўражаньне, што ўлада хоча пазбавіцца дробнага бізнэсу”.
Спадар: “Хацелася б падзяліцца сваімі ўражаньнямі ад горада Воршы і ўсебеларускага сьвята “Дажынкі”. Дык вось, як будавалі “пацёмкінскія вёскі,” так і працягваюць будаваць нават у Беларусі, толькі па-беларуску, а не па-расейску”.
