Зьвязаныя з Расеяй агенты ўплыву «вырабляюць відэаролікі і ствараюць фэйкавыя артыкулы, каб падарваць легітымнасьць выбараў, выклікаць у выбарнікаў страх адносна выбарчага працэсу і выказаць здагадку, што амэрыканцы ўжываюць гвалт адзін супраць аднаго праз палітычныя перавагі», — гаворыцца ў заяве, апублікаванай Упраўленьнем дырэктара нацыянальнай выведкі, ФБР і Агенцтвам кібэрбясьпекі і бясьпекі інфраструктуры ЗША 4 лістапада.
«Гэтыя намаганьні могуць справакаваць гвалт, у тым ліку супраць службовых асоб выбараў», — дадалі ў ім.
Выведвальныя агенцтвы ўжо некалькі месяцаў папярэджваюць аб спробах паўплываць на галасаваньне, што падтрымліваюцца расейскім урадам, на выбарах, у якіх удзельнічаюць былы прэзыдэнт Дональд Трамп, кандыдат ад Рэспубліканскай партыі, і яго апанэнт, кандыдатка ад Дэмакратычнай партыі, віцэ-прэзыдэнтка Камала Гарыс. Апытаньні грамадзкай думкі перад днём выбараў паказваюць, што рэйтынгі занадта блізкая, каб прадказаць зыход гонкі, што ўзмацняе напружанасьць, паколькі выбарнікі ідуць на выбарчыя ўчасткі пасьля жорсткай кампаніі.
Прыводзячы прыклад выкарыстаньня тактыкі дэзынфармацыі, амэрыканскія агенцтвы сказалі ў сваёй заяве, што расейскія агенты ўплыву нядаўна апублікавалі і пашырылі артыкул, у якім ілжыва сьцьвярджаецца, што амэрыканскія службоўцы ў хісткіх штатах плянуюць арганізаваць фальсыфікацыю выбараў, выкарыстоўваючы шэраг тактык, такіх як укідваньне бюлетэняў і кібэратакі.
Яны таксама заявілі, што расейскія агенты ўплыву сфабрыкавалі і пашырылі нядаўна відэа, у якім паказана фэйкавае інтэрвію з асобай, якая заяўляе аб фальсыфікацыі выбараў у Арызоне, што ўключала стварэньне фальшывых бюлетэняў для галасаваньня за мяжой і зьмяненьне сьпісаў выбарнікаў на карысьць Гарыс.
Дзяржаўны сакратар Арызоны ўжо абверг сьцвярджэньне ў відэа як ілжывае. Хаця «Расея зьяўляецца найбольш актыўнай пагрозай», у заяве гаворыцца, што Іран таксама застаецца «значнай пагрозай замежнага ўплыву» для выбараў.
«Мы ацанілі, што Іран праводзіў шкодныя кібэрдзеяньні, каб паставіць пад пагрозу кампанію былога прэзыдэнта Трампа», — заявілі выведвальныя агенцтвы.
«Іранскія суб’екты ўплыву таксама могуць імкнуцца ствараць фэйкавы мэдыякантэнт, прызначаны для падаўленьня галасаваньня або распальваньня гвалту, як яны рабілі ў мінулых выбарчых цыклах».
Агенцтвы заклікалі выбарнікаў «шукаць інфармацыю з надзейных афіцыйных крыніц, у прыватнасьці ад дзяржаўных і мясцовых службовых асоб на выбарах» у сьвятле «працяглых намаганьняў уплыву з боку замежных праціўнікаў і аб’ёму недакладнага кантэнту ў інтэрнэце, які расьце».
І Тэгеран, і Масква адмаўляюць сваё дачыненьне да якіх-небудзь кампаній дэзынфармацыі падчас прэзыдэнцкіх выбараў у ЗША.
ГЛЯДЗІЦЕ ТАКСАМА:
Чаму вынік выбараў у ЗША будзе залежаць ад «хісткіх штатаў». Аналіз СвабодыЯк выбіраюць прэзыдэнта ЗША«ПіК Свабоды». Чаму беларусаў павінны хваляваць выбары ў ЗШАТрамп vs Гарыс. Хто каго «зьесьць на абед» пасьля выбараў у ЗШАЯк прайшлі тэледэбаты Камалы Гарыс і Дональда Трампа: галоўныя тэзісы