Разам зь Ціханоўскай у сустрэчы ўдзельнічалі кіраўнікі беларускіх кампаній і стартапаў, якія працуюць у Партугаліі, а таксама прадстаўніца беларускага стартап-хаба IMAGURU Анастасія Хамянкова.
Ціханоўская падзякавала прадстаўніку ўраду Партугаліі за падтрымку рэлякаванага беларускага бізнэсу і папрасіла партугальскі ўрад зьмякчыць для яго ўмовы працы. Пасьля гэтага бізнэсоўцы маглі расказаць аб праблемах, зь якімі сутыкаюцца іхныя кампаніі, паведаміла прэсавая служба Ціханоўскай.
У прыватнасьці, закранулі пытаньні:
- абмену досьведам у пляне разьвіцьця бізнэс-асяродзьдзя і заканадаўства ў сфэры бізнэсу для новай Беларусі;
- спрашчэньня працэдуры легалізацыі для рэлякаваных супрацоўнікаў і атрыманьня ВНЖ;
- выдачы пашпартоў замежнікаў для тых, хто ня можа аднавіць дакумэнты ў Беларусі;
- зьняцьцё патрабаваньня апастылю для дакумэнтаў;
- магчымасьць адкрываць банкаўскія рахункі;
- зьмякчэньне падатковай нагрузкі для IT-кампаніяў;
- атрыманьне дакумэнтаў для беларускіх дзяцей, народжаных у Партугаліі.
Прадстаўнікі дэмакратычнай Беларусі дамовіліся, што МЗС Партугаліі вызначыць кантактную асобу, каб працягваць камунікацыю па вырашэньні гэтых пытаньняў.
Ціханоўская зьвярнула ўвагу, што тыя кампаніі, якія пераехалі ў Партугалію, працягваюць працаваць на карысьць зьменаў у Беларусі, падтрымліваюць рэпрэсаваных, беларускія ініцыятывы, добраахвотнікаў ва Ўкраіне.
Ціханоўская выказала спадзеў, што гэтыя кампаніі пасьля пераменаў вернуцца ў Беларусь і будуць аднаўляць беларускую эканоміку.
ГЛЯДЗІЦЕ ТАКСАМА: Ціханоўская заклікала міністра замежных спраў Чэхіі зрабіць выключэньні для беларусаў з закона аб візахШто яшчэ робіць беларуская дэлегацыя ў Партугаліі
Бліжэйшымі днямі Сьвятлана Ціханоўская мае выступіць з прамовай на Web-Summit у Лісабоне — адной з найбуйнейшых і ўплывовых канфэрэнцый такога кшталту ў сьвеце. Чакаецца, што там будзе каля 70 тысячаў удзельнікаў — прадстаўнікоў тэхналягічных кампаній і буйнога бізнэсу, палітыкаў і журналістаў.
Падчас візыту яна яшчэ сустрэнецца з прэм’ерам, міністрам абароны, каб абмеркаваць падтрымку беларускага бізнэсу за мяжой і мэханізмы ціску на рэжым.
Чакаецца, што Сьвятлана Ціханоўская будзе прысутнічаць на адкрыцьці групы сяброў «За дэмакратычную Беларусь» у партугальскім парлямэнце.
Таксама плянуецца сустрэча з прадстаўнікамі беларускага бізнэсу, арганізаваная ў супрацоўніцтве з Imaguru.
ГЛЯДЗІЦЕ ТАКСАМА: Беларусь — Захад: ці варта разьлічваць на хуткія перамены