У выведцы Міністэрства абароны Вялікай Брытаніі перакананыя, што Расея пасьля найбольшай атакі дронамі ў ноч на 30 жніўня будзе вымушана ўзмацніць супрацьпаветраную абарону сваіх аэрапортаў і вайсковых аэрадромаў.
«Шмат бесьпілётнікаў дасягнулі сваіх цэляў, што, пэўна, азначае цяжкасьці расейскай супрацьпаветранай абароны зь іх выяўленьнем і зьнішчэньнем. Расея, падобна, пераглядае сваю пазыцыю супрацьпаветранай абароны ў раёне паміж Украінай і Масквой, каб лепш супрацьстаяць гэтым нападам», — адзначаецца ў паведамленьні вайсковай выведкі Вялікай Брытаніі.
Брытанскія выведнікі падлічылі, што ў жніўні Расея перажыла 25 асобных нападаў зь бесьпілётнікаў.
Папярэднія ўдары па расейскіх вайсковых авіябазах прывялі да пераразьмеркаваньня самалётаў па розных месцах па ўсёй Расеі.
«Аднак нядаўнія ўдары па Сольцах і Пскове прадэманстравалі, што бесьпілётнікі маюць значную далёкасьць, што робіць далейшае пераразьмеркаваньне больш складаным. Цалкам імаверна, што Расеі давядзецца разгледзець пытаньне аб усталяваньні дадатковых сыстэм супрацьпаветранай абароны на аэрадромах, для якіх, на яе думку, існуе рызыка нападаў з дронаў», — паведаміла брытанская выведка.
ГЛЯДЗІЦЕ ТАКСАМА: The Wall Street Journal: гарантыі бясьпекі для Кіева могуць аформіць у 2024 годзеРасея другі дзень запар змагаецца з дронамі
Раніцай улада Масквы і Міністэрства абароны Расеі паведамілі, што ў Маскоўскай вобласьці зьбілі яшчэ адзін бесьпілётнік самалётнага тыпу, накіраваны на «аб’екты Расейскай Фэдэрацыі».
Над Бранскім раёнам зьбілі нібыта два такія ж дроны. Улады пераконваюць, што «пацярпелых і разбурэньняў няма», але на месца здарэньня выклікалі апэратыўныя і экстраныя службы.
ГЛЯДЗІЦЕ ТАКСАМА: The Guardian: Узброеныя сілы Ўкраіны зьмянілі тактыку пасьля нарады з вайскоўцамі NATOУ Пскове заявілі аб аднаўленьні аэрапорту з 31 жніўня
Губэрнатар Пскоўскай вобласьці Міхаіл Вядзернікаў паведаміў, што з 31 жніўня мясцовы міжнародны аэрапорта «аднаўляе працу ў штатным рэжыме».
«Дасьледаваньне цывільнай інфраструктуры аэрапорту завяршылі, аэрапорт гатовы да прыёму пасажыраў», — сказаў ён.
Тым часам спадарожнікавыя фатаздымкі Planet Labs сьведчаць аб тым, што ў ноч на 30 жніўня пашкоджаньні атрымалі мінімум два самалёты тыпу Іл-76. Цалкам поле нябачнае празь вялікую хмарнасьць.
Авіяэкспэрт Анатоль Храпчынскі паведаміў журналістам украінскага праекту Радыё Свабода «Схемы», што на здымках відаць пашкоджаньні каля крылаў самалётаў. «Хутчэй за ўсё, дронамі спрабавалі пацэліць у паліўныя бакі, якія знаходзяцца ў той частцы самалётаў. Але і гэта ўсё роўна вывядзе самалёт на капітальны рамонт, на які спатрэбіцца мінімум 2-3 месяцы», — сказаў экспэрт.
Журналісты праекту «Схемы» паведамілі, што самалёты Іл-76 стала базуюцца на аэрадроме ў Пскове. Самалёты з гэтага аэрадрому выкарыстоўвае 76-ая гвардзейская дэсантна-штурмавая дывізія арміі Расеі. Яна вядомая як «пскоўская дывізія», адна з тых, якая ўдзельнічала ў захопе Бучы пад Кіевам у пачатку поўнамаштабнай вайны Расеі.
На поўдні і ўсходзе Ўкраіны адбываюцца вельмі цяжкія баі
Расейскія войскі за апошнія содні нанесьлі 31 ракетны і 66 авіяцыйных удараў па ўкраінскіх пазыцыях і населеных пунктах. Ёсьць загінулыя і параненыя сярод цывільных, пашкоджаны жылыя будынкі і цывільная інфраструктура.
На лініях фронту адбылося 40 баявых сутыкненьняў. Украінскія войскі працягваюць наступ на бахмуцкім (Данецкая вобласьць) і мелітопальскім (Запароская вобласьць) кірунках, умацоўваючыся на новых пазыцыях.
Расейцы спрабуюць адцягнуць сілы ўкраінцаў у раёнах Мар’інкі і Старамаёрскага ў Данецкай вобласьці, Вербавога ў Запароскай вобласьці і яшчэ некалькіх населеных пунктаў у Луганскай вобласьці. «Працягваюцца цяжкія баі», — паведамілі ў Генштабе Ўкраіны.
Улады Мікалаева і Адэсы абвясьцілі аб патрэбе ў вялікай колькасьці донарскай крыві.
ГЛЯДЗІЦЕ ТАКСАМА: Расейцы атакавалі Кіеў. У Пскове гарэлі транспартныя самалёты Іл-76Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.