У горадзе Дніпро трохдзённая жалоба па загінулых. Расея інтэнсіўна абстрэльвае поўдзень Украіны

Наступствы расейскага абстрэлу Дніпра. 14 студзеня 2023

Наступствы расейскага абстрэлу Дніпра. 14 студзеня 2023

Жорсткія баі вядуцца ў Данецкай і Луганскай абласьцях. Украінскі Генштаб назваў два найбольш складаныя кірункі — бахмуцкі і аўдзееўскі.

На ўсходзе Ўкраіны працягваюцца жорсткія баі, а поўдзень знаходзіцца пад сыстэматычнымі абстрэламі расейцаў.

У Дніпры колькасьць ахвяр суботняга абстрэлу павялічылася

16 студзеня пачаўся ў Дніпры з новай паветранай трывогі. У выніку абстрэлу ў суботу, 14 студзеня, загінулі 35 мірных грамадзян, у тым ліку двое дзяцей. З-пад завалаў дасталі 39 грамадзян. Раненьні атрымалі 75 жыхароў абстралянага будынку, у тым ліку 14 дзяцей. Невядомым застаецца лёс яшчэ 35 грамадзян.

Ратавальнікі разам з жыхарамі гораду ўжо больш за 40 гадзін працягваюць разьбіраць завалы. Пэрыядычна работы спыняюць, каб прыслухацца да галасоў з-пад завалаў, спадзеючыся, што там ёсьць яшчэ жывыя.

У горадзе абвясьцілі трохдзённую жалобу па загінулых.

Выратіавальныя працы ў Дніпры, 15 студзеня 2023

Выратіавальныя працы ў Дніпры, 15 студзеня 2023

ГЛЯДЗІЦЕ ТАКСАМА: Людзі загінулі цэлымі сем’ямі. Ратавальнікі расказалі дэталі расейскага ракетнага нападу на дом у Дніпры

Атака на Херсон і вобласьць

Паводле абласных уладаў, за апошнія 24 гадзіны расейцы 90 разоў атакавалі Херсонскую вобласьць і 21 раз — абласны цэнтар. Расейскія ракеты цэлілі па жылых кварталах і цывільных аб’ектах. У выніку трое загінулі і 14 атрымалі раненьні рознай цяжкасьці.

«Вораг мэтанакіравана ўдарыў па будынку Чырвонага Крыжа, гарадзкой лякарні, цэнтру рэабілітацыі дзяцей з інваліднасьцю, суднабудаўнічым заводзе, аб’екце крытычнай інфраструктуры і жылых будынках», — паведамілі херсонскія ўлады.

ГЛЯДЗІЦЕ ТАКСАМА: «Гарыце ў пекле, расейскія нелюдзі». Што адбываецца ў Дніпро пасьля ракетнай атакі на шматпавярховік. ФОТА, ВІДЭА

Пад абстрэламі і Запароская вобласьць

Раніцай 16 студзеня расейцы абстралялі Запарожжа і навакольле. Ёсьць разбурэньні аб’ектаў цывільнай, камунальнай і прамысловай інфраструктуры. Улады паведамляюць пра некалькі параненых.

Паводле Генэральнага штабу Ўзброеных сіл Украіны, расейцы абстрэльваюць Запароскую вобласьць з танкаў, мінамётаў, ствольнай і рэактыўнай артылерыі. За апошнія содні ад абстрэлу пацярпелі 24 населеныя пункты рэгіёну.

У эпіцэнтры баявых дзеяньняў — Данбас

Жорсткія баі вядуцца ў Данецкай і Луганскай абласьцях. Украінскі Генштаб назваў два найбольш складаныя кірункі — Бахмуцкі і Аўдзееўскі. Там расейцы працягваюць наступ.

У Салядары ўкраінцы ўтрымліваюць толькі адну прамысловую ваколіцу. Пасьля інтэнсіўнага наступу ўкраінскае войска вымушана адступіла з жылых раёнаў гораду. Як паведаміў украінскі журналіст Юры Бутусаў, баі ў раёне Салядару працягваюцца, але ўпершыню зь ліпеня расейцам удалося захапіць украінскі горад амаль цалкам.

ГЛЯДЗІЦЕ ТАКСАМА: Расейскія войскі другі раз за дзень абстрэльваюць Украіну. У Дніпро ракета патрапіла ў шматпавярховік, ёсьць загінулыя і параненыя

З пачатку вайны ва Ўкраіне больш за тысячу ахвяр сярод дзяцей

Як паведаміў Офіс генэральнага пракурора Ўкраіны, з пачатку вайны ва Ўкраіне загінулі 455 дзяцей, яшчэ 897 атрымалі раненьні. Зьніклымі бяз вестак лічаць 336 дзяцей. Але і гэтыя лічбы нельга лічыць дакладнымі, бо органы ўлады Ўкраіны ня маюць доступу да акупаваных тэрыторый.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
  • Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
  • 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
  • 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
  • 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
  • З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
  • У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
  • 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.