Украінскія сьледчыя ідэнтыфікавалі прынамсі 18 расейскіх вайскоўцаў, якія адпраўлялі з Мазыра скрадзенае ў Бучы

Расейцы выкралі ва ўкраінцаў ня менш як 58 тон рэчаў. У адной з пасылак былі шліфавальная машынка Vega V6-1050, бэнзапіла Stihl, параачышчальнік Karcher, ноўтбук Lenovo, блендэр Bosch, набор рондляў, каўнік, шэсьць вудаў і два сьпінінгі.

Сьледчыя Нацыянальнай паліцыі Ўкраіны ідэнтыфікавалі прынамсі 18 расейскіх вайскоўцаў, якія рабавалі дамы ўкраінцаў у Бучы і Бучанскім раёне Кіеўскай вобласьці і потым адпраўлялі выкрадзеныя рэчы ў пасылках дадому з мазырскага аддзяленьня экспрэс-пошты СДЭК.

Гэта вынікае з двух судовых рашэньняў, апублікаваных у Дзяржаўным рэестры Ўкраіны аб завочным арышце яшчэ чатырох падазраваных — двух вайскоўцаў Фэдэральнай службы войскаў нацыянальнай гвардыі, і па адным з 46-га кулямётна-артылерыйскага полку, які нібыта дысьлякаваўся ў паселішчы Лагуннае Паўднёва-Курыльскага раёну Сахалінскай вобласьці, і 56-га гвардзейскага дэсантна-штурмавога данскога казачага полку з дысьлякацыяй у Феадосіі (анэксаваны Расеяй Крым).

Абвешчаны міжнародны вышук усіх гэтых расейскіх вайскоўцаў. Іх абвінавачваюць у парушэньні законаў і звычаяў вайны згодна з ч.1 арт. 438 Крымінальнага кодэксу Ўкраіны. Злачынства караецца пазбаўленьнем волі ад 8 да 12 гадоў.

ГЛЯДЗІЦЕ ТАКСАМА: «Беларускі Гаюн»: расейскія салдаты вывозяць зь Беларусі скрадзеныя ва ўкраінцаў машыны і скупляюць золата

Што было ў пасылках

Згодна з матэрыяламі крымінальнай справы, адзін з нацыянальных гвардзейцаў адправіў пасылку вагою 60 кіляграмаў у Бірабіджан. У пасылцы былі шліфавальная машынка Vega V6-1050, бэнзапіла Stihl, параачышчальнік Karcher, ноўтбук Lenovo, блендэр Bosch, набор рондляў, каўнік, шэсьць вудаў і два сьпінінгі.
Другі расейскі нацыянальны гвардзеец адправіў 20-кіляграмовую пасылку ў Маскву. У ёй былі: электрычны гэблік Sturm, шліфавальная машынка «Зенит», сеткавы дрыль «Дніпро», пляншэт Samsung, электрапіла, генэратар Sturm, дзьве бэнзапілы Einhell, адзеньне, касмэтыка, матрац двухспальны, ноўтбук Lenovo.
Вайсковец з 46-га кулямётна-артылерыйскага полку адправіў пасылку вагою 3,8 кіляграма ў горад Рубцоўск Алтайскага краю. У ёй былі мэталяшукальнік Gareth Ace 250, бэнзапіла Husqvarna 64, пляншэт Lenovo, машынка стрыгчы, аўтамабільны тэлевізар, прылада заточваць інструмэнты.
Вайсковец з 56-га гвардзейскага дэсантна-штурмавога данскога казацкага полку адправіў у Рубцоўск Алтайскага краю найбольшую пасылку — яна важыла 150 кіляграмаў і ўтрымлівала: пляншэт Apple iPad 10.2, пляту да кампутара MSI Z270-A PRO, відэакарту да кампутара Gigabyte Geforce GTX1080, пляту ASRock FM2A55H-D6S, блёк сілкаваньня да кампутара Chieftec, працэсар Intel Core76700K, гульнёвую прыстаўку Sony Play Station 4 Slim 1TB і кантролеры да яе, тачку двухколавую Forte, LED-УФ лямпу для пазногцяў Global Fashion 36W Power 15 Leds, прас для валасоў Grunhelm GHC-722T, музычную калёнку Divoom Voombox Outdoor, машынку стрыгчы валасы Panasonic ER-GB60-k, шліфавальную машынку Forte AG-8-125, набор інструмэнтаў Haisser, акумулятарную зашрубку Forte CDL1215-2B2, зварачны апарат Kaiser MMA-300 HomeLine, жаночую дублёнку з натуральнага футра, два газавыя побытавыя балёны Novogas, прылады заточваць інструмэнты Forte CD-120 і "Forte CT3-3100, шматпрофільны інструмэнт Multi Tool Forte MG 17218.

Гэтыя рэчы расейскія вайскоўцы выкралі з дамоў жыхароў вёскі Бліставіца Бучанскага раёну Кіеўскай вобласьці.

ГЛЯДЗІЦЕ ТАКСАМА: «Медиазона»: Дзьве траціны пасылак ад расейскіх вайскоўцаў, адпраўленых з Мазыра 1 і 2 красавіка, не дайшлі да адрасатаў

Расейцы выкралі ў украінцаў ня менш як 58 тон рэчаў

Сёлета ў траўні СМІ паведамлялі, што расейская кур’ерская служба дастаўкі СДЭК за час вайны ва Ўкраіне адгрузіла з пунктаў адпраўкі паблізу ўкраінскай мяжы ня менш як 58 тон пасылак. Іх адпраўлялі людзі ў вайсковай форме — расейскія вайскоўцы або вайскоўцы сэпаратысцкіх утварэньняў на ўсходзе Ўкраіны.

ГЛЯДЗІЦЕ ТАКСАМА: Мапа марадэраў ад Калінінграду да Ўсурыйску. Што і куды расейскія салдаты перасылаюць з Мазыра і Навазыбкава. ФОТА

Пік адгрузак прыпаў на пачатак красавіка — менавіта тады расейскія войскі адступалі з Кіеўскай вобласьці і з поўначы Ўкраіны. Украінскія сьледчыя ідэнтыфікуюць датычных да рабаваньня расейскіх вайскоўцаў на падставе відэаматэрыялаў, апублікаваных у СМІ.

У красавіку ўкраінскія сьледчыя назвалі адно прозьвішча нібыта расейскага вайскоўца, які адпраўляў пасылку з аддзяленьня СДЭК у Мазыры і меў дачыненьне да расстрэлу мірных жыхароў Бучы. Ім выявіўся мазыранін Сяргей Калацэй, які запэўніваў, што ён грамадзянін Беларусі, і зьняпраўджваў агучаныя сьледзтвам абвінавачаньні. У жніўні стала вядома, што праваахоўныя органы паўторна правяраюць факт службы Сяргея Калацэя ў расейскіх войсках.

ГЛЯДЗІЦЕ ТАКСАМА: Расейскія вайскоўцы за тры месяцы вайны ва Ўкраіне адправілі 60 тон пасылак

ГЛЯДЗІЦЕ ТАКСАМА: Ва Ўкраіне паўторна правяраюць факт службы ў расейскіх войсках беларуса Сяргея Калацэя, якога падазраюць у забойствах у Бучы

Вайна Расеі супраць Украіны

А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.