Упершыню пра сына Лукашэнкі грамадзкасьць даведалася 12 красавіка 2008 году. «Калі гаварыць пра пераемніка, то буду рыхтаваць самага маленькага — унікальны чалавек», — сказаў ён. Літаральна праз пару дзён Коля зьявіўся з татам на рэспубліканскім суботніку, які адбываўся падчас будоўлі «Менск-Арэны». Малы дапамагаў Лукашэнку заліваць бэтон. На той момант Мікалаю было тры гады і восем месяцаў.
Аляксандар Лукашэнка з малодшым сынам на суботніку ў 2009 годзе
У той час Аляксандар Лукашэнка супрацоўнічаў з брытанскім паліттэхнолягам лордам Тымаці Бэлам. Некаторыя лічаць, што ідэя браць з сабой паўсюль малодшага сына належала менавіта Бэлу. Сам лорд Бэл на гэтую тэму не выказваўся, ён памёр у 2019 годзе.
ГЛЯДЗІЦЕ ТАКСАМА: Памёр піярнік Тэтчэр і Лукашэнкі«Мой хвост»
Дзяржаўныя СМІ падалі факт зьяўленьня Мікалая Лукашэнкі як само сабой зразумелы. Яны ня сталі тлумачыць, хто маці хлопчыка. Сам Лукашэнка пра гэта таксама не гаварыў.
У інтэрвію расейскай «Камсамолцы» ён толькі адзначыў, што маці працуе лекарам. Лукашэнка казаў, што Коля паўсюль ходзіць зь ім: «Ні з кім ня можа застацца, мой хвост».
Журналісты выказвалі думку, што маці Мікалая можа быць былая асабістая доктарка Лукашэнкі Ірына Абельская, дачка экс-міністаркі аховы здароўя Людмілы Пастаялкі. Адным зь першых такую вэрсію выказаў журналіст Павал Шарамет. Нядаўна «Кібэрпартызаны» пацьвердзілі гэтую інфармацыю.
Пэрсанальныя дадзеныя Мікалая Лукашэнкі і Ірына Абельская, атрыманыя «Кібэрпартызанамі»
Ірына Абельская ад 2009 году ўзначальвае Рэспубліканскі мэдычны цэнтар Кіраўніцтва спраў прэзыдэнта, які інакш называюць «лечкамісіяй». Пра адносіны Мікалая з маці нічога невядома, але зьяўлялася некалькі сумесных здымкаў.
ГЛЯДЗІЦЕ ТАКСАМА: «У нас таксама лечаць хворых з каранавірусам» — Ірына Абельская, галоўны доктар мэдцэнтру Кіраўніцтва спраў прэзыдэнтаДзед асуджаны за антысавецкую дзейнасьць
Бацька Ірыны Абельскай Сьцяпан Пастаялка яшчэ ў сталінскія часы быў асуджаны на 25 гадоў лягераў за «антысавецкую дзейнасьць», а менавіта за дапамогу Арганізацыі ўкраінскіх нацыяналістаў. Яны жылі ў Бярозаўскім раёне. У зьняволеньні Сьцяпан прабыў чатыры гады, пасьля сьмерці Сталіна яго вызвалілі.
Публічнае жыцьцё Мікалая Лукашэнкі пачынаецца ад 2008 году. За нядоўгі пэрыяд хлопец сустракаецца з многімі вядомымі палітыкамі, такімі як Барак Абама, Сі Цзіньпін, Уладзімір Пуцін, Уга Чавэс, папа Бэнэдыкт ХVI. Апошняму хлопец падарыў буквар. У 10-гадовым узросьце быў на Генэральнай асамблеі ААН разам зь міністрам Уладзімерам Макеем.
Падчас аўдыенцыі з папам Рымскім Бенядзіктам ХVI. 2009 год
«У яго характар больш цяжкі, чым у бацькі, лідэрскі. Будзе спрачацца і ісьці да канца, пакуль лоб сабе не разаб’е», — казаў Лукашэнка пра малодшага сына.
ГЛЯДЗІЦЕ ТАКСАМА: Лукашэнка: Коля ходзіць на заняткі, хоць палова вучняў у яго школе застаюцца дома«Мне ня вельмі хацелася б быць прэзыдэнтам»
Мікалай Лукашэнка пайшоў у першую клясу ў школу мястэчка Астрашыцкі Гарадок пад Менскам. Адзінае інтэрвію Мікалай даваў 11-гадоваму журналісту з Прыморскага краю Яўгену Грышыну.
«Калі шчыра, то мне ня вельмі хацелася б быць прэзыдэнтам, бо гэта складанае жыцьцё. Ня ўпэўнены, што змог бы. Я ня ведаю, кім бы хацеў быць, магчыма, лекарам, можа, вайскоўцам. Яшчэ не пасьпеў вызначыцца», — казаў хлопец.
У 2020 годзе Мікалай паступіў у 10 клясу ў Ліцэй БДУ на біялягічны профіль, там жа вучыліся ўнучкі Лукашэнкі, дочкі Дзьмітрыя Лукашэнкі. Але пасьля пратэстаў жніўня 2020-га забраў дакумэнты. Хадзілі чуткі, што Мікалай вучыўся ў Маскве. Але потым стала вядома, што ён канчаў прыватную школу, якая знаходзіцца ў Драздах. Журналісты зь Беларускага расьсьледавальніцкага цэнтру высьветлілі, што адной з заснавальніц той школы была ягоная маці Ірына Абельская.
ГЛЯДЗІЦЕ ТАКСАМА: Лукашэнка сыну Мікалаю: «Вырасьцеш — станеш прэзыдэнтам»Падаўляў пратэсты з аўтаматам у руках
Таксама ў 2020-м Мікалай разам з бацькам зьяўляўся падчас акцыі пратэсту 23 жніўня. У руках у хлопца быў аўтамат.
А ў кастрычніку таго ж году быў у СІЗА КДБ, дзе Лукашэнка вёў перамовы з палітвязьнямі, у тым ліку Віктарам Бабарыкам і Сяргеем Ціханоўскім.
Адметна, што ў Колі так і не зьявіліся старонкі ў сацыяльных сетках. Сам Лукашэнка казаў, што супраць гэтага, каб не траўмаваць дзіцяці псыхіку. Тым ня менш бацька казаў, што Мікалай аматар «пагуляць у танчыкі».
«Іншы раз ён мне кажа: мне патрэбна інфармацыю знайсьці, у школе задалі. Дзьве хвіліны шукае, а потым гадзіну гуляе ў „танчыкі“. У мяне адна задача — яго адтуль вырваць», — казаў Лукашэнка.
Ад 1 верасьня ў Мікалая Лукашэнкі пачынаецца новая старонка біяграфіі. Ён паступіў на біялягічны факультэт БДУ, будзе навучацца на спэцыяльнасьці «Біятэхналёгіі». Рэктар біяфаку — прафэсар Вадзім Дзямідчык, які шмат гадоў працаваў у Вялікай Брытаніі. Пра вынікі цэнтралізаванага тэставаньня Мікалая Лукашэнкі нічога невядома.
ГЛЯДЗІЦЕ ТАКСАМА: Дэкан вярнуўся з Брытаніі, добры буфэт, адлічалі за пратэсты. Што кажуць пра факультэт БДУ, дзе, магчыма, будзе вучыцца Мікалай Лукашэнка